舊年十月中嗰陣開始，銅鑼灣零售核心區已經有吉舖提早搵短租，不過，市場反應就麻麻。到依家為止，波斯富街六個吉舖中，暫時只有3個以短約租出，而租客清一色係賣利是封等賀年物品商戶。估計每個舖月租約13至22萬元，比起長約市值租金低約六至七成。

銅鑼灣波斯富街六個吉舖中，暫時只有三個以短約租出，租客清一色是賣賀年品的商戶。

賀年物品店職員陳小姐指，短租舖位租金高，經營利潤不高。

荷蘭的遊客Jet認為，農曆新年氣氛增強購買相關物品的意欲。

銅鑼灣核心零售地段短約地舖承租個案

舊年短租同區勿地臣街地舖嘅連鎖零食店759阿信屋，母公司CEC國際（00759）主席林偉駿話，一線街短約舖位租金仍然嗌得好高，所以冇諗過「添食」短約舖。

地舖月租廿萬元

銅鑼灣一線零售區喺舊年已經有10個吉舖，唔少都以短約形式招租，其中吉舖比較多嘅波斯富街，依家暫時有3個地舖短約租出。有代理同劉Sir講，呢批租客都係賣利是封等賀年物品。

其中波斯富街56號地舖，鄰近租金全球最貴嘅羅素街，面積約1,300方呎，每月短約租金估計約22萬元，呎租約170元。

同街57號地舖等樓面，面積約1,400方呎，月租料約20餘萬元，呎租約140元。上述兩個舖依家短約租金，估計比起長租市值租金都低約70%。

林偉駿話，上述兩舖依家短約租金比長約市值租金低好多。不過，月租都超過20萬元，對喺零售核心區已有分店嘅連鎖商戶嚟講，再額外短約承租地舖嘅興趣唔大，反而部分年終「打游擊」賣賀年物品嘅商戶，會趁此黃金消費檔期承租。

佢話，759阿信屋一向唔主張透過短約舖位嚟擴充，所以依家租用嘅勿地臣街12號短約舖，若業主搵到商戶長約承租，就會盡早搬走。

商戶：今年吉舖多

過去六年喺銅鑼灣都有短租舖位賣利是封等物品嘅商戶，其職員陳小姐就話，「今年呢區吉舖選擇多咗，但租金依然好貴，所以除租用波斯富街地舖外，暫只有租用同區富明街2至6號地舖。」