一四年投資市場將面臨數個主題，其一是美國聯儲局的退市步伐，雖然市場預期每次聯儲局會議後，將以減少100億美元的買債規模進行，但聯儲局反而想向市場傳遞訊息，減債規模視乎兩大方向：就業市場及通脹。

雖然預期中國今年GDP經濟增長仍有7%，不過趨勢向下測試底部，相反美國經濟或只有3%增長，但趨勢明顯炒上，今年資金明顯由東轉去西。近日美國貿易赤字大減，對未來GDP亦起正面刺激，若市場炒聯儲局減債規模加大，相信金股匯債市場統統有反應，股市或出現更明顯調整；但另一邊廂，美元出現大升機會提升，十年期債息將向3.5厘前進。

不過，如果退市無咁快，而美國、中國及歐元區通脹仍舊偏低，呢個情況睇怕都仲會持續一段時間，對金價仲係一個不利因素，想借抗通脹炒起金價都唔得，而市場炒復甦概念，又似乎無避險情緒可推高金價，金價跌穿1,180美元似乎都只係時間問題。