十二月美國聯儲局會議記錄顯示，多數與會者認同每月減少100億美元買債規模合適，認為購債的邊際效用可能已下降。前晚美國十年債息變動唔大，收2.98厘，一四年聯儲局到底會唔會次次開會都縮減100億美元買債規模？睇嚟關鍵在於就業市場可唔可以撐住月均20萬的新增職位。今晚會公布十二月非農職位，大行估增加20.3萬份，失業率維持7%。

阿里巴巴施殺傷戰術攻網遊市場，手遊股能否獲益有待觀察。（資料圖片）

太陽日誌2014/1/10

阿里巴巴透過由零開台去顛覆手遊市場利潤分成規則，到底對騰訊（00700）業績即時有幾大衝擊，大家得個估字，但由主站平台十蚊袋九蚊，變為得番一蚊落袋，如果騰訊要跟阿里巴巴玩法，姑勿論跟到足抑或跟少少，都肯定唔係好消息。

阿里施殺傷戰術

筆者諗起上世紀，香港電視（01137）前身城電以殺價回撥服務單挑香港電訊，係就係賺唔番每年流失的數以十億計直撥長途電話收入，但結果有眼見，香港電訊就咁畀佢打殘。

毫無疑問，今次阿里巴巴破格分成條件，騰訊盈利能力及市值，應該唔多唔少有所流失，到底手遊股可以「繼承」到幾多好處，只能放長雙眼等睇戲。幾隻手遊股之中，尋日只係雲遊（00484）跌6.8%，其餘IGG（08002）及博雅（00434）繼續炒到癲，分別再升29%及9%。

睇番兩隻股票兩日內累積升幅67.5%及42.5%，市值去到104億及81.4億元（兩間公司往績分別虧損1,343萬美元及賺1.42億元人民幣），當然無幾多投機者會對佢盤數有興趣，多數都只係着眼前途無限的動人故事。筆者都認為呢類股票只能訂止蝕合埋眼衝入去，至有機會贏到大鑊，不過單從投機角度睇，尋日IGG有1.84億股易手，等同去年十月所發新股總數3.76億的49%，易手率創上市新高，話大孖沙無趁機滲多少貨出街都無人信，要捧場都係等等先好。

雅居樂跑輸同業

話口都未完，內房股已靜靜起革命，正路股如合景泰富（01813）、融創（01918）、世房（00813）、潤地（01109）、龍湖地產（00960）、中國海外（00688）以及富力（02777），昨日升幅介乎2至5%。

有人快樂有人愁，舊年內房銷售熱爆，但依然有部分失落分子，好似雅居樂（03383）啱啱公布一三年全年銷售403.4億人仔，達唔到預期420億人仔的銷售目標，尋日股價中段以為無乜影響，升過2.7%去到8.25元，最後打回原形收8.03元無起跌。

目標訂得比較保守，向來係華人企業特色，雅居樂居然將目標訂得太進取（目前交出22.3%年度售樓增長，其實唔差），部分項目施工比預期遲之外，大行認為同年初期望極高的海南及雲南旅遊地產項目，未達到預期效果有關，似乎第二間度假物業的概念，在內地仲未係好成熟。