政府前年底開始，為遏止炒樓同減少外地買家入市需求，所以推出買家印花稅同雙倍印花稅，但點知反令「賣殼」成交增加。好似一向受內地客熱捧嘅奧運站及九龍站二手屋苑，區內代理話，兩區去年十二月「賣殼」成交佔整體比例超過30%，單月涉及稅款逾8,000萬元。有學者就憂慮，此類交易增加，將會係逃稅漏洞先兆。

近期二手豪宅屋苑「賣殼」成交個案趨增。（資料圖片）

奧運站及九龍站一帶上月錄得的「賣殼」二手成交

綜合市場資料，奧運站上個月錄到約24宗二手買賣，當中估計有7宗係「賣殼」成交，涉及買家印花稅及雙倍印花稅金額逾4,260萬元。

學者憂成逃稅漏洞

好似一個一號銀海相連複式戶單位以約9,800萬元轉售，傳聞交易就係以轉讓公司股權形式進行，涉及稅款已超過2,300萬元。而同屋苑有一個中層單位以此方式賣出，成交價4,500萬元，涉及有關稅款逾1,000萬元。

至於鄰近嘅九龍站屋苑同尖沙咀港景峯及西南九龍御金．國峯，近幾個月「賣殼」成交比例高咗唔少，上月呢批屋苑錄到約18宗二手買賣。

代理話，呢批屋苑當中至少約6宗屬「賣殼」轉售，佔比例約33%。

除咗逾千萬元豪宅，不少新盤二手細價單位為咗避開辣招，都會「賣殼」出售，御金．國峯近期有個中低層戶就係用咁嘅方式賣出，成交價約860萬元。

理工大學建築及房地產學系教授許智文話，由於以轉讓公司股權形式出售物業，可以慳番新稅款，減低入市成本，難怪同類成交增加。

許智文仲話，但如果數量繼續係咁升，將會造成逃稅嘅漏洞，所以有需要考慮推出新措施阻止趨勢，例如推出措施管制持有單一物業公司轉讓等。

內資炒帝峯變銀主盤

講開辣招稅，自從政府將措施加辣之後，過去一年市場陸續有銀主盤出現，部分更係由內地業主持有。

好似西南九龍帝峯．皇殿，市傳由一個內地業主持有嘅兩個高層單位，最近由銀主以約2,700萬元同1,400萬元開價放售，相信係呢個盤首現同類放盤。