前晚美股三大指數反彈，在250日線短期搵到支持的港股，挾淡倉下勁升283點，收報22,996點，成交額似模似樣，有759億，係十二月廿日以來最多，除兩隻藍籌博彩股「例牌」創新高之外，騰訊（00700）重上500元及滙控（00005）繼續火燒冷灶，都為昨井噴式升市提供燃料。

去年內房銷售表現強勁，與悲觀的股市預期有極大落差。(資料圖片)

太陽日誌2014/1/9

綜合大行預測世房業績（人民幣）

尋日啱啱講完話個市兩極化，股民可以選擇合埋眼定止蝕衝入升咗唔少的新經濟股，或者守株待兔買基本因素唔錯兼估值超平的股份等運到，結果推介的中建材（03323）升得0.9%，介紹過N次的手遊三寶IGG（08002）、博雅（00434）及雲遊（00484）則分別勁升29.7%、30.6%及15.5%，就算定力再好，實在都好難做到坐懷不亂。

手遊股鑊氣十足

手遊股炒到出煙，皆因IGG通告話其手機遊戲《城堡爭霸》落戶騰訊，同時另一宗顛覆手遊市場的消息，來自剛染指手遊平台的阿里巴巴。傳統行規，平台與開發商九對一的分成比例，被阿里巴巴所打破，宣布將給開發商的比例提升至八成，阿里巴巴保留兩成，呢招肯定吸引更多開發商向呢個手遊初哥靠攏，兼直接衝擊對手騰訊的傳統分成模式。睇嚟兩個中國網絡土豪開始有埋身肉博味道，估計戰場好快會燒到去視訊、即市通訊等市場，一眾二三四五六線相關股份，炒風亦好快進入高潮。

瑞銀報告睇好內房，話綜合估值預期市盈率6.5倍及45%資產淨值折讓，去到廿六個月新低。查實內房股同啱啱講過的水泥股一樣，係估值超吸引，不過短期被基金經理忽視的抵買板塊。去年內房股大豐收，預期至少七間內房股的售樓金額打入千億俱樂部，因賣樓套現金額比預期勁，綜合的負債比率亦由前年年底的八成降至五成左右。

世房反彈走勢佳

可是，個市驚內地宏觀經濟唔明朗，及憂慮中央再出招壓抑樓市，去年十月開始股價見頂兼跌定先，無視下半年超強銷售數字。以去年首十一個月已賣樓984億元人仔，鐵定進身千億俱樂部成員的恒大（03333）為例，股價較十月高位跌23.7%，同去年初比較更累跌39%，最近公司更訂今年賣樓目標為1,100億人仔，同悲觀的股市預期有極大落差。

尋日見內房成交確實好番唔少，看來開始引起春江鴨的注意，其中瑞銀睇好名單之一的世茂房地產（00813），前日掂完250日線即彈，個勢唔錯，去年十一月單月銷售升87.2%至57.17億元人仔，使首十一個月累積合約銷售去到613億元人仔，升45%，比目標550億元人仔多一成一，一三年大幅超額完成已成事實，大行預測的一四年估值5.7倍（只及歷史平均估值一半），股息率5.2厘，又係蔗渣價錢的平價選擇。