內地保監會放行保險資金投資內地創業板，市場估計有萬億人仔資金獲准進入創業板，消息刺激創業板指數大升4%。不過，主板權重股沽壓未消，滬綜指仍低收作結。據講，監管部門因應市場對IPO的反應頗大，故出招穩定市場信心，未來兩周會否再放行長錢進場維穩，不妨等着瞧。阿莊依然相信，即使IPO重啟會對魚缸帶來短暫震盪，長遠影響肯定係正面，毋須因為短線波動對A股長期表現失去信心。

通達從事手機外殼業務，客戶包括華為、中興、諾基亞等，生意唔憂做。(資料圖片)

科網股抖咗一日又再發力，其中IGG（08002）勁升近三成，事緣公司與騰訊（00700）達成合作協議，管理層更揚言明年初可申請轉主板，又拋出三年市值突破100億美元的目標。

科網股上車唔怕遲

板塊順勢起舞，雲遊（00484）及博雅互動（00434）分別升15%及30%。阿莊已不只一次提及，今年科網股會開狂野派對，以最高估值迎接阿里巴巴登陸港股！想分杯羹，有心唔怕遲。

事實上，月初魚缸表現顯示，對沖基金今年頭砲好可能係押注科網股，好耐冇見過單一板塊炒到咁熱鬧。阿莊都覺冇隻手遊股喺倉有啲「寂寞」，尋日沽出表現不濟的粵海置地（00124），今日會換入第一視頻（00082）。

除手遊股熱炒外，智能手機相關股份亦有異動，中國無線（02369）股價急升13%，較少人留意的通達集團（00698）股價創五十二周新高0.72元，收報0.7元，升16%。通達從事製造手機外殼，主要客戶包括華為、中興、聯想及諾基亞等，今年智能手機市場銷售將呈爆發性增長，零部件供應商生意唔憂做，通達自可受惠。

去年通達開發鐳射直接成型（LDS）工藝，以設計新一代天線系統，成為首家提供垂直綜合供應鏈的供應商，今年將會正式量產。去年上半年，通達純利同比增長15%至1.3億元，現價一二年度市盈率10.9倍，息率3厘。保守假設一三年度純利增長兩成，現價一三年度預測市盈率不到10倍。今年其手機業務看好，估值具吸引力，加埋本月以來成交轉趨活躍，顯示資金到位。

尋日以大陽燭突破去年以來的阻力位，短線回吐守住0.66元可搭順風車，目標踢上0.86元（相等於一三年度預測市盈率12倍），失守0.6元止蝕。