二○一四年揀外幣要小心啲,暫時無一隻係升到好誇張好極端嘅外幣逆市做好。不過今年其中一個主題就係炒作美聯儲收水,咁央行繼續寬鬆既貨幣就難有好表現,所以澳元、日圓就成為繼續睇淡既貨幣。

歐元都繼續寬鬆,但都仲係好強喎,咁投資者就要留意埋歐元區嘅經常帳,上年下半年大量資金流入歐洲,淨係睇啲基金廣告係咁推歐洲股票抵買、炒復甦概念就知,始終導致歐洲連續超過20個星期有資金流入,歐元區經常帳盈餘創紀錄新高撐起歐元強勢。

澳洲就唔同了,經常帳赤字佔GDP 3%,澳洲需要依賴資金流入,不過各大行仲睇緊澳洲央行有兩次減息機會,澳元吸引力下降,而美債息上升令美元資產吸引力上升,將導致澳洲為經常帳融資更加困難,央行亦承認削減經常帳赤字好難。

今年各貨幣強弱,基本上一目了然,投資者就算唔加隻腳踩低弱勢貨幣,都未係買入的時候。