人人講美國退市，實際最早退市的，乃係○九年豪擲4萬億人仔救市的中國。尋日唔見人行逆回購踪影，意味十四日期逆回購連續五周缺勤，A股腳軟，滬綜指跌6點，收報2,109點。展望今年，中國企業面對三高形勢（高匯價、高息口及高負債），抑或美國經濟復甦對新興市場產品及服務需求回升的幫助比較大，由A股連續四年跑輸全球主要股市，去年仲反牛市之潮流，跌近7%，十二月，具前瞻性的PMI數據，中小型規模企業已在50盛衰線樓下，內地經濟復甦得嚟，總係比投資者有點「虛」之感覺。

太陽日誌2014/1/3

綜合大行預測中國水務業績（港元）

港股升33點，報23,340點，跨年連升六日，可惜成交極奀，未夠500億，估計最快要到下周一，更多賓架陸續放完假，後市係龍係蛇先見真章，但睇見藍籌仲算升多過跌（24升21跌），可是國指已經率先走樣，40隻成分股32跌得8升，重磅的內銀、內險通通見紅，一四年紅盤高收的恒指，算係攞個意頭，但整體後市真係睇佢唔透，尤其見到一星期SHIBOR（人仔拆息）由聖誕前高位8.84厘撻番落尋日4.98厘，但滬綜指仲係不為所動。

騰訊升穿500元

內銀、資源、工業及電訊股短期有反彈無大升，形成整個大市氣氛有點拉牛上樹之感。不過，史提芬個人認為，目前個市氣氛其實一啲都唔差，只係資金相當揀擇，對傳統產業無乜興趣，集中在受惠新消費模式或者國策傾斜的新經濟股。去年，網股、博彩股有反地心吸力裝置，尋日騰訊（00700）收市終於企穩500元樓上，資金明顯熱炒無蟹貨攔路的半新股，以及彩票及環保類股份。

昨日中滔環保（01363）、新環保能源（03989）、天津創環（01065）以及中電新能源（00735）升幅都超過一成，而光大國際（00257）、京能潔能（00579）、北控水務（00371）、中國水業（01129）升幅亦介乎1.6至9.8%，似乎但凡個名有節能、新能源、水務、以至燃氣嘅，統統都有資金捧場，懶理到底值定唔值。

有趣是業務透明度唔低，業績亦都穩打穩紮的中國水務（00855），尋日畀人點穴一樣，原地踏步收2.87元，公司主營業務包括興建及經營水務設施，供水、污水處理、供水網絡建設都有所涉獵。○四至一三年期間，公司供水規模由3萬立方米升至448萬立方米。

業績欠缺爆炸性

而過去三年針對旗下的二至四線城市，單位耗水量年複合增長約8.1%。中央傾向調高水價以反映送水成本的上升，亦達到減低水資源浪費的目標，最近全國多個城市都醞釀加水價，部分預期升幅更達到兩成五。至於污水處理項目方面，去年七月，分別購入廣東晟環保及邯鄲成晟水務34%股權，染指天津、北京及河北等地的污水處理項目，令現有污水處理能力升近一倍，至接近每日30萬噸。

綜合大行預測，中國水務一四年賺3億元，預期市盈率15.6倍，以○九年估值介乎15至30倍之間上落，現正處下限，或者與中國水務業務發展較成熟，業績沒有爆炸性有關，不過熱錢有理無理湧入相關板塊，中國水務2.8至3元入貨風險有限，假如再有污水處理項目的收購落實，或者會成為股價催化劑，唔怕守株待兔嘅可以諗諗佢。

長假前電池股炒過一轉，昨日則以整固為主。呢個板塊去年因為受制於行業整頓期，冇大炒過。不過，仍留得在市場的大型業者，捱得過呢場淘汰賽，自有新天地。若今年內地新能源汽車銷售有突破性進展，呢個板塊亦有條件追落後。

中聚電池可冷敲

較熱門選擇可留意超威動力（00951），至於天能動力（00819）走勢則較弱，想搵細價的冷門之選，建議留意中聚電池（00729），集團上月以6億元收購從事電動汽車研發的Agnita Limited 58.5%權益，以每股0.32元發代價股份支付，與昨日收市價0.345元只一步之遙。