港股在一四年首個交易日的表現雖然反覆，但最終仍能保住紅盤高收，恒指收市升33點，報23,340點，但大市成交仍然未完全復常，不到500億元，事關重磅股除騰訊（00700）外整體表現欠突出，反而股仔同半新股成熱捧對象。

華創旗下啤酒業務早已具備獨立上市條件，未來有機會成股價催化劑。(資料圖片)

如無意外，本月起美國將開始退市，加上近期亞洲地區局勢有點不尋常，全球資金流仍充滿變數，投資者宜盡量分散市場風險，小心駛得萬年船！

半新股炒到開巷，阿莊上月推介過的海螺創業（00586）升到唔識停，尋日又再創新高22.4元，收報21.9元，升3%。雖然半新股勝在冇蟹貨，但一隻股票總唔能夠拋離合理值太遠，尤其係依家仍處大型上落市，而唔係大牛市，炒賣到咁上下，就要識得沽貨獲利割禾青，免得貪勝不知輸！以海螺創業為例，升到上22元樓上，有貨可開始分段沽貨食胡，冇平貨在手無謂入市高追。

啤酒業再有新併購

同樣，大市唔會長期行上落市，總有一天迎來較明確的方向。呢期炒股獲利，可考慮將利錢放到優質重磅股身上，等指數起動再收割。未知大家有冇留意，最近嘉士伯擬以15.6億元人仔，全購在內地擁有八家啤酒廠、年總產能達12億升的重慶啤酒。

記憶之中，呢次應該係去年華潤創業（00291）透過旗下雪花啤酒買入粵海置地（前稱金威啤酒）（00124）的啤酒資產後，啤酒業又一宗大型併購，且涉及外資參與，反映在外地同業眼中，雖然內地啤酒市場已經有三大業者，但發展潛力仍大，併購價值猶在。

去年，青島啤酒（00168）股價累升最多五成幾，反觀持有雪花啤酒的華潤創業，股價跑輸同業及大市。以現價計，青啤現價市帳率5.7倍，華創僅1.5倍。究其原因，受零售及食品業務表現不濟拖累，華創去年業績難睇，首三季純利跌四成多，加上母公司高層曾傳出負面傳聞，而公司與TESCO組合營的成效仍有待觀察。

不過，阿莊認為，經歷去年的調整期，華創今年整體經營情況趨於穩定，估值有改善空間。此外，其實華創的啤酒業務早具分拆獨立上市的條件，為更好地體現資產價值，以應付零售等業務發展，華創具資產重組概念，且看今年會否有大動作。整體而言，華創現價中長線具值博率，見到去年十一月開始有基金入市增持。自問係價值型投資者，有耐性釣大魚，此股確是值博之選。