舊年白居二措施首推之後，公屋同居屋第二市場多咗2,500個生力軍，初期都可以激活整體免補價第二市場物業市場。點知翻查政府資料，原來舊年全年只係得2,010宗第二市場成交，按年都只係多咗唔夠200宗，而升幅比前年未有白居二措施時，僅僅多出2個百分點。

去年部分指標居屋第二市場的成交量，升幅比前年未有白居二措施時，僅僅多出2個百分點。（資料圖片）

去年部分指標居屋第二市場成交量

劉Sir睇番房委會過去一年資料，公、居屋第二市場喺舊年全年暫只錄得約2,010宗買賣，同前年約1,812宗比，按年都只係升咗約11%，其實前年都有9%升幅，舊年只係多出2個百分點，白居二新招成績真係「有目共睹」。

天頌苑料最旺場

上個月呢類免補價市場只有68宗買賣，按月再少四成三，同去年六月份白居二爭入市嗰陣比，更加大減超過86%，上個月宗數更係舊年最少嘅一個月。

睇番舊年指標居屋免補價交投量，都係細價樓跑出，其中天水圍天頌苑舊年有成74宗第二市場買賣，睇怕有機會係上年最多免補價買賣嘅居屋。

同區天盛苑、馬鞍山錦豐苑同埋慈雲山慈愛苑，舊年成年都有57、56同55宗買賣，交投量都幾理想。

交投升咗，連帶個價都升，以錦豐苑為例，前年十二月平均實用呎價約5,100元，但呢個屋苑舊年七月平均實用呎價推高至約6,360元，升幅逾24%，但到上月均價跌番落約5,410元；而天頌苑呎價，由唔夠3,000元升到上個月嘅約3,470元；市區慈愛苑平均實用呎價，都由前年底約5,100元，升到舊年中穿埋6,000元。

龍門居減價即洽

第二批白居二就殺到，近排屯門、天水圍同東南九龍第二市場居屋睇樓量急升，部分業主亦減價配合。

祥益地產黃慶德話，屯門龍門居有三房單位，上月中以綠表價230萬元放盤，但賣唔出，近排大幅減價32萬元，即刻有綠表客洽。

美聯話，將軍澳和明苑B座高層7室，啱啱以綠表價約248萬元賣咗。

另一方面，私樓繼續淡，利嘉閣指，全港50個指標屋苑上個月得427宗買賣，按月少15%，係上年第三低月份。