澳元今年跌咗超過一成，愈來愈多機構投資者加入唱淡。繼巴克萊同高盛等大行唱淡後，貝萊德都話澳洲經濟增長水平低，將令澳洲央行喺明年四月同八月再減息兩次，去到2%，澳元現價0.88水平仲有10%下跌空間，可以去到0.80水平。

美元兑加元走勢

不過，筆者對於現價沽澳元真係有少少保留，方向無錯係睇跌，原因大家都已經耳熟能詳，不外乎係睇中國經濟放緩、國內需求疲弱、失業率上升，最重要係經常帳赤字惡化。

不過，始終澳洲係少數仲有AAA評級嘅國家，十一月起已見到有央行開始增持其國債，作為分散外匯儲備的策略，可能令澳洲債券價格下跌的速度比其他市場慢，令澳洲十年國債同美國十年國債差距收窄，對澳元嘅需求未必太少。

大手沽澳元有保留

技術上，要留意嘅價位亦都幾清楚，分別係而家0.88、0.85同埋0.80水平，所以現價再大手沽空澳元，筆者就有保留。當然澳元未必升得好多，都係先睇番0.9060同0.9270兩個位先。明年要博，個人反而覺得可以留意下隻加元，加拿大經常帳赤字同埋外商直接投資喺近幾季持續惡化嘅情況十分明顯。

美元兌加元升穿1.06後已破位，如果有機會落番1.04至1.06水平可留意，目標可以睇番1.10水平。