重推嘅天水圍輕鐵天榮站上蓋項目上個星期五招收意向反應理想，港鐵（00066）極速喺尋日推出招標。劉Sir八到，為免重蹈流標覆轍，今次招標條款大幅簡化。無既定補地價同入場費金額，更會負責搬遷鐵路設施同取消分紅，仲加設回購條款。只要財團出價高於補地價金額便可，簡單講即係變相「一口價」形式招標，相信吸引力會較首次招標大。

天水圍輕鐵天榮站上蓋項目招標條款大幅簡化，相信有助提高項目吸引力。（資料圖片）

港鐵行政總裁韋達誠

天榮站上蓋重新招標詳情

港鐵發言人同劉Sir講，尋日起邀請發展商遞交天水圍輕鐵天榮站上蓋項目嘅標書，截標日期係明年一月二十一日。發言人話，鑑於項目首次招標嘅反應、目前市況同埋鐵路設施搬遷等因素，今次招標安排情況會有調整。

天榮站上蓋項目今年初就因為補價問題，成為首個「零標書」鐵路項目，當時補價金額達26.86億元，另外仲要畀4.1億元入場費，所以大家都好關心今次招標條款有咩唔同。

不設既定補價及分紅

其實全世界都估到今次條款一定要變，先至可以吸引到財團入標，但劉Sir相信無人會諗到有咁大變動。

消息人士透露，最新招標條款不設既定補地價及入場費金額，亦無提及分紅，港鐵方面仲會負責臨時鐵路設施嘅搬遷工作，而政府話今次屬價高者得形式，發展商只需出價不低於項目補地價金額便可。

可市值1.6倍回購項目

但講到最特別係今次破天荒加設回購條款，港鐵可以市值1.6倍回購整個項目。劉Sir覺得，目的係為發展商提供一條保險線，萬一將來樓市出現下調，港鐵都會回購項目，等發展商輸都輸少啲。

有部分發展商似乎都對今次條款幾受落，主要係大幅簡單化，而家新加嘅回購條款或多或少能夠降低發展風險。

資料顯示，天榮站總樓面約98.2萬方呎，提供單位大概1,500伙，上個星期已收到多達19家財團遞交意向書。而項目年初首招意向時，接到約16份意向書。