樓市辣招癱瘓整個物業市場，唔單止各地產代理行叫苦連天，私人拍賣行亦舉步維艱。有拍賣行指出，交投靜、盤源短缺係致命傷。過去賴以為生嘅銀主盤，比○四、○五年高峰期4,000至5,000個勁跌到依家只係得番幾十個呢類放盤，生意慘淡，近月有拍賣行連家庭電器都拍埋，佢哋寄望明年交投可以由谷底反彈。

沙田名家匯仍有銀主盤尚未售出。

樓市辣招嚴重打擊物業市場，多家拍賣行生意亦大受影響。（資料圖片）

多次拍賣仍乏承接銀主盤

劉Sir同喺拍賣行內打滾二十年嘅環亞拍賣曾傑俊（俊哥）傾開，佢話今年生意係近十年最差嘅一年，連工商物業都受辣招影響，生意慘淡，過去市況幾唔好都有銀主盤撐住。

好似○四、○五年高峰期，市場銀主盤高達4,000至5,000個，自己都係主力拍賣呢類物業，不過近年樓市淡靜，銀主盤驟減，依家市場只係有幾十個呢類放盤，同高峰期比大幅減少99%。依家只係單靠法院物業同業主盤支撐，佢坦言生意表現「相當難過」。

寄望明年樓市轉活

佢寄望明年農曆年後，發展商可以帶頭減價賣樓，帶動整體二手樓價平多5至10%，市場承接慢慢多番，但預期只係集中500萬元或以下嘅細價物業，因為流轉相對容易，同早一、兩年每月有過千萬元物業成交，形成強烈對比。佢希望最快年中會有轉機，帶動公司可以盡快平手，並逐步進入有錢賺階段。

至於另一間拍賣行忠誠拍賣行，除咗平日經常舉辦嘅物業拍賣會，近月亦罕有地連家庭電器都進行拍賣，好似有電飯煲同多士爐等等。

負責該拍賣會嘅周生話，公司過去都有拍賣開汽車、遊艇、甚至珠寶等雜項，而最近拍賣嘅大批家庭電器的確係罕有，印象中係近呢兩、三年嚟第一次，今次涉及成千百件小型家庭電器，仲話已經賣咗，相信有可能係夜冷客。

承接有賴業主肯劈

該行鄭世傑亦同劉Sir講，睇番今年下半年銀主盤只係升左10至20%，希望明年可以吸納更多住宅盤源。

因為鄭世傑預期銀主盤未來都唔會點樣大升，佢相信明年樓市仍然處於「有減價先有承接」嘅緩慢階段。