內地嚴重水緊,一星期人仔拆息抽上8.8厘的半年新高,A股升唔起,亦令港股唔多願跟外圍反彈,恒指尋日升109點,報22,921點,成交得440億元,是近三個月以來最奀。

太陽日誌

綜合大行預測金界業績(美元)

仲有兩個全日市,兩個半日市,二○一三年港股就會成為歷史,睇番今年港股第一個交易日,恒指收23,311點,同尋日收市指數比較,居然仲差400點至番到起步點。表面睇,股市似乎牛皮膠着,但如果過去一年,閣下買的是博彩、科網、乳業、燃氣、醫藥等股份,收穫可以極為豐盛。

好多股市預測,事後睇番都係得啖笑,筆者無水晶球可以預知未來,但都有幾點可大致作為一四年入市參考。一,近日美股強勢畢呈,完全無懼退市,雷曼爆煲後,六年時間內流入新興市場的熱錢,好大機會繼續回流到經濟確認見底、步入復甦之途的美股。

此外,中國經濟由量轉到質的追求,只着重GDP數字的粗放型經濟時代成過去,這個全球天然資源大買家的需求減少,難怪澳洲央行亦緊張起來,透過出口術意圖令貨幣貶值振興出口,而本地上市資源股估值儘管由高峰回落,但中短期內,大環境唔配合,估計仲係有反彈,無大升。

中小網股可留意

明年阿里巴巴好大機會在香港掛牌,連同騰訊(00700),兩大巨頭市值加起來估計介乎1.6萬億至1.8萬億元,大大擴充市場深度,機構投資者參與的興趣估計亦會更大。但相比估值高昂的一線股,一些中型甚至小型網股反而更值得留意,皆因兩大巨頭都有透過股份溢價購併一些相關公司,從而加快鞏固手遊、即時通訊等市場份額的傾向。

過去一年,最可惜是錯過了博彩股的驚人升幅,今年澳門博彩收入增長,遠遠超乎年初大行的預測,博彩股明年是否繼續發光發熱?似乎要睇已經重倉揸貨的對沖基金經理喜好,不過有一點可以肯定,往績PE去到40至50倍水平,單是每月公布的博彩收入增幅,都足以令揸重貨的股民,坐立不安。

金界值得炒落後

一線博彩股太貴,早輪提過隻日本彈珠機股DYNAM(06889),僅僅高管提一提明年日本國會會商討是否發出賭牌,一旦成事公司有興趣競投,真係十畫都未有半撇,股價經已狂抽五成,可見資金發掘周邊博彩概念的喜好。

同類股份中,金界(03918)估值算係相對理性的一間,公司是柬埔寨金邊市唯一的合法賭場,今年柬埔寨首三季旅客增長19%,同期金界博彩總收入升14%,唔比澳門的16.7%差好遠,其中大廳賭桌按押籌碼升16%至2.9億美元,老虎機及VIP投注額則分別升15%及14%。

未來增長故事分短中長線,短期是吸引更多內地旅客的推廣活動,中線則有一五年落成投入運作的Naga二期酒店賭場項目,長線則是預期一八年才投入營運的俄羅斯濱海邊彊區投資計劃。

金界一四年PE13.7倍,雖然博彩股睇增長,好少人理會股息,但佢嘅預期息率有4.9厘,比起部分公用股及REITs仲要高,近日見股價每次調整,掂一掂10日線又再上,落後博彩股中,值得留意。