內地魚缸上周五尾市大幅波動，翻查資料，新華富時指數系列季度檢討上周五收市後生效，咁啱同日又係A股股指結算日，加埋錢荒影響市場承接，幾個因素巧合地出現，造成不尋常結果。

富智康發盈喜，加上與黑莓簽訂策略夥伴協議，雙喜臨門，值得睇好。(資料圖片)

尋日內地拆息進一步抽高，但見A股已回穩，恒指反彈則受制於23,000點關，大市成交僅440億元，假期氣氛濃厚。經驗相告今日半日市好大機會出現挾倉情況，加埋長假要輸溢價，暫時別沾手指數相關輪證為妙。

恒安勢重返紅底

人大常委會開始審議「單獨二孩」政策，但相關概念股僅個別發展，現代牧業（01117）及雅士利（01230）升3至4%。其實，乳品股估值唔平，去到某個階段，產能亦會受限，其實要分享嬰孩潮投資機遇，專做紙尿褲的恒安國際（01044）亦可取，可以逢低吸納，進身「紅底股」只係時間問題。

執筆期間，傳來富智康（02038）發盈喜，預計今年業績將轉盈（一二年度蝕3.16億美元）。事實上，今年上半年公司已錄得中期純利1,723萬美元，如今預告下半年純利較上半年幅度為大，反映盈利能力持續回升，主要受惠於產能及經營效率提升，以及嚴控銷售成本及一般及行政開支，優化研發資源。

富智康股價尋日升4.8%，收報3.92元，當時未出盈喜消息，股價做好主要係受與黑莓（Blackberry）簽訂五年策略夥伴協議有關。兩者將合作開拓印尼及墨西哥等高增長的智能手機市場，料明年初展開。近年受手機業務存貨撥備困擾的黑莓，本來已為富智康客戶，是次選擇加強合作，外判設計同生產低端手機業務，藉此提升存款管理及零件供應穩定性，以騰出資源開拓更有盈利的企業軟件等業務，而富智康接到大單，亦可進一步彰顯產銷上的規模效益，成就雙贏局面！

睇形勢，富智康業績已可確認走出低潮，未來一年有望持續回復盈利增長動力，從而為估值帶來上調空間。今年九月，富智康股價高見5.6元後反覆回落，至250日線3.8元水平現承接。既然預告業績對辦，可趁機在3.8至4元水平收集，中線唔難上番4.5元樓上，失守3.5元止蝕。阿莊相信，跟比亞迪電子（00285）一樣，富智康將成為智能手機市場增長的得益者，重估故事可望於明年延續。