今年初睇好中資股，結果一地眼鏡碎，所以三中全會之後的升浪，參與股票已經相對較少。中資股相當趕客，宜炒不宜揸，尤其是國企股，肩負向外併購及向內養一大班人的社會責任，盈利做得好的機會更微。

吸取今年的教訓，中資股只是偶然值得投機，不少基金持貨量偏低，甚至可能長期做淡，所以一旦有消息觸發追貨潮，會有一段又快又勁的升浪。寧願在這種熱潮中高追，以快打快，好過等回落後吸納，自恃可以長期投資。

高追損失有數計

要知道往往低處未算低，一年前個個話A股平，一年後跌一成半，不會認錯，只會話更平。而且市場經歷一次又一次失望，反攻更難，一味呆等的話，可能等到天荒地老也不見家鄉。反而高追明知炒動力，不幸睇錯，也較容易有決心止蝕。

要投資中國，除了個別行業外，從背景出發，自己會揀香港公司及低負債民企，至少管理層做決定，主要是以盈利作為考慮，而不是盲目追求規模，令股價長遠突圍的機會率較高，而且香港人財政管理審慎，較少過度投資的包袱，加上規模細又往往做得好，隨時成為內地企業兼併的對象。

雖然十一月起細價股亂飛，其中一個原因只是炒殼，但氣氛復甦後，來年應有一批中小型股，憑藉基本因素跑出。要投資中國，倒不如搞一個細價股組合，揀十隻至十五隻，未必要隻隻中，拉勻後有着數便可以，總好過大注買大型國企。