近幾年內地及香港兩地經濟活動愈嚟愈頻密，唔少內企亦响本港購入寫字樓設立分公司，佢哋至愛之一嘅灣仔會展廣場辦公大樓。過去一年多，數埋至少有五宗成交都係內企購入。該廈就有高層1室全海景單位，以3.37億元賣畀在港上市嘅內地企業，成交呎價高達29,550元，創該廈呎價新高，並躋身全港寫字樓呎價次高。

灣仔會展廣場辦公大樓現時佔約九成單位由內地企業使用。（資料圖片）

灣仔會展廣場辦公大樓部分內地企業買家資料

灣仔唔少甲級商廈嘅租戶同業主都係內地企業，所以唔少呢類公司嚟到香港，都喺同區搵寫字樓，大家同聲同氣，可以有個照應。

九成單位內企使用

早喺八八年落成嘅會展廣場辦公大樓，依家佔達約九成單位都係由內地企業使用，所以更加係佢哋首選之一。近年買入該廈嘅內地企業包括中國石油財務（香港）及361度（01361）等。

有代理同劉Sir講，會展廣場辦公大樓高層1室散單位，已交吉一段時間，原業主本來叫價每方呎約3萬多元。不過，見市況回軟，決定每方呎降價約五百元，減價涉額約570萬元，好快已經有內地上市公司以約3.37億元購入，以面積約11,415方呎計，呎價高達29,550元。

相對全港寫字樓呎價最高嘅金鐘美國銀行中心高層戶，呎價亦只差約650元。另高緯環球有份報告話，本港寫字樓租金增長麻麻，明年會維持喺現水平。

金都一籃子逾億洽

旺角西洋菜南街地舖租盤少，租金貴，雖然年近歲晚，但藥房仍繼續喺零售核心區搶租地舖，連鎖經營嘅眼鏡88，租咗三、四年嘅旺角豉油街近西洋菜南街一個地舖，面積約700方呎，聽講畀間藥房以每月約62萬元成功預租，呎租近900元，新租金升幅約24%。

土瓜灣金都豪苑地下部分、1樓同廣告位，面積逾1.6萬方呎，買家以約1.05億元洽，較業主○九年初購入價升逾74%。