又到聖誕，加埋農曆年臨近，租務市場吹淡風，業主唔想過年「無租收」，寧願減租就市，東涌區今個月租務成交只得約77宗，比八月時旺市跌咗超過40%，而將軍澳區本月租務成交比高位亦跌近50%，啱啱有個顯明苑開放式單位只係租咗6,800元。

東涌映灣園月內僅錄29宗租務成交。(資料圖片)

劉Sir睇番市場數據，東涌今個月暫時都係得約77宗租務成交，比八月高位全月有140幾宗跌咗逾40%。

映灣月內僅29伙租出

中原范偉康話，好似該區映灣園咁大個屋苑，今個月只有29宗租務成交，連續兩個月都少過30宗，其中8座中層D室三房戶，月租約1.62萬元租咗，實用呎租約25.7元。

美聯馬立成講，少咗個入伙盤，將軍澳區今個月租務交投只得154宗，比高峰期全月近300宗少咗近50%，依家月租低過7,000元都有交易，好似居屋顯明苑一個開放式單位，以月租僅約6,800元租出，應該係區內暫時最平的租盤，實用呎租約31.5元。

少咗「雙非」人士支持，粉嶺區最近租務都靜咗。中原陳永強講，花都廣場今個月得7宗租務成交，其中3座低層D室減租700元，月租約7,800元租出，實用呎租21.1元，低市價11%，比上年七月舊約再平200元。該行又話，筲箕灣新樓i．UniQ譽都高層D室開放式單位，都要減租1,500元，先成功每月1.45萬元租出。

譽都海怡降價獲承租

該行盧鏡豪話，鴨脷洲海怡半島今個月都只有約30宗租，比過往「閒閒地」每月50至60宗，交投跌成40%；近排有一個27座高層內園兩房單位，業主驚遲啲租唔出，最終減租約1,000元，以月租1.38萬元租出，實用呎租26.7元，低市價約8%。

不過，都唔係肯減就有成交，康誠物業謝寶山都話，藍田滙景花園本月都有5宗租務交投，比暑假少約三成，最近一個9座低層戶業主願意減租2,000元，以每月1.9萬元放租，但暫時未租得出。