魚缸Blogger：威靈控股可再破頂

自從內地執行新的家電能源效益標準後，威靈控股（00382）股價屢創新高，有見尋日再升3.7%至2.48元，即市高見2.49元，接近上個月暴炒妹推介時定的阻力位兩個半，短線如果仲守得住20日線2.27元，話唔定可以再破頂，唔大貪先睇2.7元。

威靈喺內地同海外從事製造、分銷及銷售家電的電機及電子電器產品，客戶包括海信科龍（00921）、海爾電器（01169）等。過去五年公司盈利持續增長，由○八年的1.97億元，增至一二年的6.4億元，未來發展能見度無乜問題。

此外，城鎮化帶動家電需求，而青海省實施新一輪的家電下鄉；另家電商融合電子商務，如海爾同阿里巴巴搞物流，客仔好搵供應商自然獲益。兩者均將促進農村地區消費，加上高效節能係大方向，有利其零部件銷售，威靈股價應該仲有水位。