呢幾年工商舖物業十分搶手，發展商都紛紛出售非核心工商舖物業套現。截至本月十三日，12個發展商今年暫共賣14項商用物業，總額逾180億元。其中恒地（00012）最勁，今年先後累積拆售黃竹坑環匯廣場約九成半寫字樓樓面，上個月再賣油麻地九龍行全幢商廈，加埋回籠近37億元。

金朝陽THE SHARP零售樓面共32層，預計二○一五年第三季入伙。（資料圖片）

恒地計劃推售長沙灣GLOBAL GATEWAY TOWER工廈樓花。（資料圖片）

今年部分發展商售出商用物業個案

劉Sir綜合幾間代理嘅資料，包括新地（00016）及信置（00083）等共11個發展商，舊年共賣咗20項商用物業，共套現約200億元。

環匯贈車位 累銷95%

不過，今年二月殺出雙倍印花稅措施，發展商賣非核心商用物業都難免受影響，截至今個月十三日，上述兩個發展商，同恒地、會德豐地產及南豐等共12個發展商，今年暫售出14項商用物業，套現逾180億元。

韋堅信測量師行物業發展及投資董事許偉國話，一手住宅物業銷售條例下，今年上半年新盤銷售速度慢，發展商遂積極賣非核心商用物業。

綜合代理資料，咁多發展商中，今年以恒地賣商用物業最多，今年九月首度向環匯廣場全層買家送車位，變相減價約1至2%谷銷情，項目累售約九成半樓面，套現逾20億元。

本月初恒地計劃推長沙灣GLOBAL GATEWAY TOWER工廈樓花賣，料售罄可套約30億元，三項物業悉售出，套現將共逾66億元，將成今年出售商用物業最多嘅發展商。

味千撤出西洋菜南街

另外，今年好多連鎖食店都捱唔住貴租被踢走。味千拉麵同劉Sir講，佢哋喺旺角西洋菜南街開咗多年嘅舖，上個星期啱啱約滿結束咗，原因係租金問題，已經喺附近開番，好似油麻地同彌敦道都有。

代理話，味千喺嗰度開業十幾年，舊租估計約60萬元，依家市值月租約83萬元，以間舖面積約1,000餘方呎計，呎租約830元，計起嚟租金升約三成。