市場觀望美國議息，加上A股低收，恒指一度失守22,999點，收市唔見131點，報23,114點。強勢股依然故我，騰訊（00700）逆市高收，光伏股則現回吐，股仔突圍而出，力寶華潤（00156）急升38%，下午中途停牌。不過，呢類股仔真係好似神經刀，唔知幾時開車幾時煞車，亦唔知會唔會突然拉閘，跟炒最緊要量力而為。

近期手遊股成為市場焦點，而第一視頻除手遊業務外，其電訊媒體及彩票業務，同樣惹人憧憬。（資料圖片）

阿莊100萬元投資組合

光大銀行（06818）被股民揶揄為魚缸「藍燈籠」，每次話搞上市都遇上跌市，今次亦唔例外，唔同嘅係今次在阿爺祝福下順利進行招股，並將於本周五掛牌，而論集資額，更成為今年的「新股王」，會唔會從此改運，一帆風順，就要等着瞧。

講番股仔，早前旗下中國手遊（NASDAQ：CMGE）獲社保入股的第一視頻（00082），股價以52周新高0.9元收市，升幅8%。中國手遊乃內地手機遊戲開發商，去年九月起其ADR於納斯達克市場交易，但第一視頻股價未有因此而受惠，直至今年，阿里巴巴集團有意在港上市，加埋騰訊股價迭創新高，以及多隻手遊股以高估值在港掛牌，才吸引市場注視。

除手遊業務外，第一視頻在內地經營電訊媒體及彩票相關業務，今年上半年營業額2.15億元，但仍錄得9,000多萬元虧損，主要係電訊媒體業務處戰略調整期。至於彩票業務，由於去年起內地正式確定互聯網為銷售彩票的合法渠道，呢瓣業務前景亦有可為。

社保入股手遊業務

上月中旬，第一視頻宣布以私人配售方式，按每股14.5美元，向社保等機構配售中國手遊股份，涉及資金1.2億元。上周五，中國手遊股價做好，收報18.41美元，升7.7%，今年以來累計升幅達3.7倍，市值4.9億美元。經配股後，第一視頻仍持有中國手遊經擴大權益約48.49%，社保則持有3.71%。

以現價計，第一視頻市值30億元，市帳率1倍，在三網融合及4G發展之下，照計公司三大業務前景均可予憧憬，只是早幾年此股大炒過一轉，股價在高位累積一定蟹貨，最近兩年多股價經歷低潮，照計街源已收乾，只是等吹雞起跑。究竟尋日股價創52周新高，係咪開車訊號，阿莊都係估估吓，但評估過核心業務發展潛力、社保效應同手遊股板塊估值，斷估咁好景唔會甘心繼續坐冷板櫈，故正考慮小注一試。

經驗相告，呢類股仔一係唔發市，發市當三年。確認以大成交突破0.9元大關的話，中線目標睇去年高位1.2元水平，止蝕位定在0.79元。