近月街舖租金升幅收窄，但經營多年嘅老舖舊租金偏低，新租金升幅仍可觀。被視為香港大學學生同教職員飯堂嘅西半山般咸道莎厘娜餐廳，租約年初已屆滿，業主舊年底已嗌新租每月16萬元，個舖吉咗九個月後，聽聞有食肆洽租，月租傾緊13萬元，較業主意向低19%，但比舊租高4倍。

現獲洽租的西半山般咸道33號地舖，前租客莎厘娜餐廳今年初已遷出。（資料圖片）

今年老店不敵貴租個案

半世紀餐廳不敵加租

劉Sir近排聽唔少代理講，今年舖位租金升幅比預期差，除一線街舖偶爾會倍升，大部分舖位升幅僅20至50%。不過，莎厘娜餐廳以前租用近半世紀嘅般咸道33號地舖等，面積共約1,400方呎，搬出前月租只係約2.6萬元。

不過，自從上址個舖舊年畀投資者林清林以近4,000萬元買入後，新業主已經喺約滿前叫定預租，意向月租去到約16萬元，莎厘娜不敵新租搬走咗，最後個舖吉咗約九個月，最近聽到市場話有個中式食肆出價每月約13萬元洽租，呎租約93元，相信好快有結果。

一線街舖求過於供，唔少業主都唔憂租，舖壇老手黎永滔話，早排租出銅鑼灣景隆街5號地舖畀找換店，月租約10萬元，呎租約2,000元，比起原先老商戶陳全記鮮菓嘅租金，高約19倍。

珠寶行300萬洽旺角舖

而旺角亞皆老街67至69號舖租期就到，已經有本地珠寶行出價300萬元洽租，比依家時裝店租金190萬元，高出約58%，但同目標350萬元仲有差距。

佢仲話，雖然舖位投資市場「黃金十年」已過去，但係一線街靚舖始終供應少，租金仲企得住。

黎永滔又話，可以考慮投資外國物業，好似歐美地區，經濟尚未完全復甦，日後仲會有上升空間，但一定要實地考察、同埋了解當地稅制。其實佢自己今年亦响英國倫敦投資物業，涉及金額約10億元。