上星期，華爾街股市連跌三日後，到周五終於回穩，道指升15點，報15,755點，主要反映科技股表現的納指微升2點，重上4,000點心理關口之上。整個星期計，道指及標普指數累計仍要跌1.6%，納指則跌1.5%，是近四個月以來跌幅最大的一周。

太陽日誌2013/12/16

綜合分析員預測金保利業績（港元）

講到尾，美股今年累積升幅唔少，上個月美國失業率回到7%，進一步逼近伯南克提出的退市界線6.5%，促使估本周二、三聯儲局議息後宣布縮減每月850億美元買債規模的分析師比例，漸漸過半數，股市獲利回吐，也是無可厚非。

近排港股表現都幾令人失望，今年個市再一次挑戰24,000點阻力失敗，上星期的跌市，把恒指十一月十八日以過千億成交下留低的23,050至23,390點上升裂口都補埋，即係三中全會改革詳細內容曝光後入市追貨的散戶以至大孖沙，統統都要做蟹，未來定必要有更勁的利好消息，以及更大筆的新資金入市，先至可以消化23,390至24,111點區域內的蟹貨。

今年唔少對沖基金表現唔錯，跑贏大市一大截，尤其鍾情博彩股的一類，事實依家幾隻賭股晒士都唔細，金沙中國（01928）、銀河娛樂（00027）、永利澳門（01128）、新濠博亞（06883）、澳博控股（00880）及美高梅（02282）統統市值過千億，加埋一齊市值達1.4萬億，「晒士」差千多億就拍住大笨象滙控（00005），有充足交易深度兼beta夠大，仲要今年跑贏恒指足足40至125%（平均104%）。內地網股有多少趨勢，會緊接成為對芬佬炒賣新寵，可惜暫時仲係得隻騰訊（00700）夠斤兩，普遍市值仲係太細未成氣候。

網股等阿里再落鑊

不過，睇最近阿里巴巴集團搵海爾電器（01169）合作搞物流，即時發揮到金手指作用，或者等阿里都上埋市，個市多個選擇，到時氣氛先會達到高潮。好似博雅互動（00434）及IGG（08002）等歸邊半新股，賭身家就唔建議，但小小哋捧吓場，放埋三幾個月，或者有意外收穫。

近排成日提及處理霧霾問題的受惠行業，有朋友問起光伏股。毫無疑問，「十二五」規劃提及至一五年全國光伏機組達到35GW的遠大目標，但光伏股之難炒在於，上游公司永遠面對供過於求的麻煩，最近有調查機構話，內地光伏設備年產能力達40GW，實際出貨不過11.5GW，產能過剩到離晒譜。

至於下游方面，成日被中央補貼金額傳聞左右，再者，唔少下游光伏發電公司本身估值行得太前，好似拍住中國招商、國家電網及保利協鑫（03800）等龍頭企業的金保利新能源（00686），一○年先轉型，幾年間不斷收購光伏發電場，基地遍布青海、甘肅、新彊、江蘇，啱啱仲話諗緊前海。計埋可換股票據，現價1.74元的金保利，潛在市值達85億元，估值幾乎透支緊一五年盤業績，投資者肯唔肯畀兩年後嘅估值買嚟貨，見仁見智。

史提芬講過好多次，今時今日，個市好似得番有概念但貴到死，又或者平到極但業績一般兼無故事、無人吼兩類股票。不過，早幾日金保利大股東以1.7元減持近10億股，股價雖然一度插水去到1.45元，但之後幾日拗腰上番嚟，守得住基金接貨價，純以投機角度，短期似乎有點睇頭。