今年二月政府推出雙倍印花稅（DSD）辣招後，原本炒風仲好熾熱嘅工商舖物業，交投即時插晒水，尤其大額物業最受影響。不過，「磚頭」始終係投資者至愛，最終就諗到以轉讓公司股權形式買賣物業，即俗稱「買殼」或「賣殼」形式慳番稅款。其中城中六位投資老手，就幾近全用以上方式買賣物業，料成功慳稅超過2.7億元。

今年十一月中，大鴻輝興業主席梁紹鴻透過「買殼」形式，向恒地購入油麻地九龍行全幢。(資料圖片)

梁紹鴻

部分以轉售公司股權方式買賣物業個案

劉Sir知道，辣招加重物業買賣成本，令市場成交大減。從韋堅信測量師行同市場資訊睇到，今年二月至十月，過億元工商舖買賣70宗都冇，比起舊同期差唔多180宗，大減約110宗，減幅約六成。事實上，投資者為咗慳成本，多咗交易轉以出售公司股權形式進行。

大鴻輝慳億四夠掃靚舖

大鴻輝興業主席梁紹鴻話，今年十一月中，向恒地（00012）購入油麻地彌敦道555號九龍行全幢，是透過「買殼」形式購入，作價16.88億元。用呢個方法，佢可以慳番印花稅款達約1.43億元，足夠買同區彌敦道一個地舖。

佢話政府推出DSD措施旨在打擊物業炒風，但係對長線投資者，就大大加重入市成本，佢相信透過呢種方式買賣物業嘅情況會增加。

近年多次短炒獲利嘅投資者「物流張」，今年四月初以公司名義買入上環孖沙街20至24號地下、閣樓及1樓，成交價6,600萬元，須繳雙倍印花稅約561萬元。

廖偉麟「買殼」首拓酒店

佢買完冇幾耐就即刻以確認人身份放售，嗌價約8,000萬元，仲同準買家傾掂數，願意減價4.25%賣。

不過，交易就以「賣殼」形式進行，同時將原先要畀嘅印花稅，連同該公司一併轉售。新買家計過數，認為可省回印花稅，大家都有着數，張氏約三日帳面袋約1,000萬元，賺幅超過15%。

紀惠集團廖偉麟同有關人士今年十月首度進軍酒店市場，以6.8億元購入嘅灣仔晉逸時代精品酒店，亦透過「買殼」形式購入，每間房涉資約694萬元，如成交以一般物業買賣形式進行，要畀稅約5,780萬元。