歐元區近日經濟數據開始參差，已經無咗第三季嘅驚喜，反映雖然歐洲經濟最壞時間過去，不過反彈到依家，引擎又開始無力，睇嚟歐洲央行都要繼續諗諗辦法，進一步刺激先有可能持續復甦。

匯市上其實一直反映緊呢個趨勢，交叉盤很大程度是受基本因素帶動，例如歐洲經濟由下半年開始復甦，睇睇美國傳統基金和ETF等歐洲股票基金已連續22個星期錄得資金流入，全年頭11個月流入規模高達200億美元。

拆細嚟睇，當中40億美元係由第三季數據好轉嘅時候，即八至十月份流入。相反，日本央行繼續實行量寬印銀紙，睇番日本10年國債孳息，比起年中曾經接近1厘水平，仲不升反跌至0.65厘，喺開始擺脫通縮下，日本投資者買國債無法取得預期的回報，自然要諗辦法「走出去」。

美國10年債息上番2.8厘，更令機構投資者如保險及退休基金等開始計數，不如沽日債買美債仲有着數，反正沽出嘅日債有日本央行接手埋單，年結因素又過去，故日本反而有資金流出，其中十月尾更錄得流出1.26萬億日圓買外國證券，都直接令歐元兌日圓攀升。

聽聞好多大行Trade嘅Bonus已經由每季計數改為每年一度，如果係咁，十二月再大手交易嘅誘因就減少，再將歐元兌日圓推上去嘅機會就減低，開始獲利平倉嘅誘因反而加大，短線阻力143.80，重要支持區在138.50至140。