雙倍印花稅（DSD）果然夠辣，自今年二月推出以來，工商舖買賣愈嚟愈靜。睇番代理行畀嘅料，截至今個月八日，今年工商舖物業買賣註冊登記量約9,531宗，只係舊年全年的53%外，更創下○三年沙士後新低，期間登記總值亦只1,013億元，相當於舊年全年的58%。

今年商廈買賣市場交投銳減，將創○三年沙士後新低。(資料圖片)

按年工商舖註冊量及總值走勢

劉Sir啱啱收到美聯工商舖（00459）同其他代理行嘅報告，咁多類商用物業之中，商廈買賣交投最慘淡，港島區甲級商廈連續有三個月成交「捧蛋」。出招前工商舖買賣勁旺，今年二月買賣註冊登記量錄約2,268宗。

辣招打壓買家轉審慎

不過，之後三月份就跌到得番1,346宗，跌幅超過40%，之後多個月嘅每月登記宗數都少於千宗。而截至本月八日，今年整體工商舖買賣註冊登記量合共僅約9,531宗，同舊年全年約18,035宗相比，仍然落後約8,504宗。

自從政府推措施打壓工商舖炒風，業主睇淡後市，紛紛劈價出貨，買家出手都轉趨審慎，終令做價下跌。睇番上述資料，今年一月同二月工商舖買賣註冊登記總值各達約199億元同埋190億元，三月份即跌至約141億元，按月少逾25%，之後每個月登記額都唔過百億元。

全年交投恐不足萬宗

截至本月八日，今年工商舖登記額暫只約1,013億元，相對舊年全年嘅約1,744億元，暫時落後約731億元，將會係○九年約770億元後嘅新低。

在各類商用物業之中，今年商廈買賣最慘淡，暫時約1,542宗，只達去年全年嘅約50%。

此外，睇番差餉物業估價署資料，今年七至九月港島區甲級商廈都冇錄得買賣註冊登記，情況極為罕見。

另一方面，美聯工商舖行政總裁黃漢成都話，睇怕本港今年全年工商舖買賣一萬宗都冇，將會創○三年沙士後嘅新低。