美股開始唔當退市係一回事，牛氣沖天，加埋內地十一月出口勝預期，貿易順差升至近五年高位，對昨日大市本來頗有期望，可惜A股動態向來係「估佢唔到」，昨早上十一月內地CPI曝光後，A股未夠十點半經已散番落嚟，恒指高開低收，開市一刻升過227點後，全日無段好睇，收市得68點進帳，報23,811點，成交比上周五縮近百億至539億元。

太陽日誌

大行預測中國生物製藥業績（港元）

港匯再度轉強，番到7.7535，可見就算恒指升唔起，但資金卻未見流走迹象。大市炒股唔炒市，尋日濠賭、網股、醫藥及部分股仔都炒到癲晒。上周五美國上市的內地網股高收，騰訊（00700）一開市就搶上480元見歷史高位，可惜後勁不繼，撻番落462.4元收，僅升2.4元。內地4G發牌落實後，果然見一眾二線網股同手遊股異動，博雅（00434）升2.6%、雲遊（00484）升4.7%、做game的IGG（08002）一升就12.6%，資金取態似乎係估值愈低，升幅愈大！海爾電器（01169）沾到阿里巴巴的金糠，獲後者入股，聯手發展物流生意，升13%報收21.05元，阿里的換股債券價19.334元，值得炒家參考。

信達配售僧多粥少

瘦田無人耕，耕開有人爭，上星期DYNAM（06889）主理人話如果日本國會明年通過開賭，會着手申請賭牌，雖然十畫未有一撇，但近幾日股價有如坐火箭一樣，尋日再升19%，報收28.1元，個多星期內股價由18元起步累積狂升五成六。如果攞住往績市盈率11.5倍，或者以為仲係好抵，但要知道開賭仲停留在「吹水」階段，彈珠機生意本身無乜增長，短炒的看官最緊要身手夠敏捷兼且留意消息發展。

周三才公布IPO結果的信達資產（01359），消息話國際配售部分僧多粥少情況嚴重，據聞有大孖沙賭盤已經叫到一成五以上溢價要貨，有入飛看官們今次要贏舖勁難些少，搵餐晏應該問題唔大。

上周五，上海PM2.5創歷史新高，全國廿個省份104個城市空氣污染達嚴重程度。霧霾問題對中國經濟發展的影響都咪話唔麻煩，世衞資料話霧霾輕則引起眼部、咽喉不適，重則可以引起呼吸系統及心血管疾病。人類每日大約需要15千克空氣，當有害微粒直徑細至2.5um以下，將透過呼吸直接進入血液，30歲以上，如果長期曝露在高染污的PM2.5空氣下，年致死率將達0.28%。本來中央十二五中已提出制約污染行業、發展潔淨能源等治本之法，可惜始終遠水難救近火，空氣污染持續，醫療相關疾病的藥業及醫療機構，生意恐怕真係唔憂做。

史提芬心目中的PM2.5概念股，有中國生物製藥（01177）及羅欣（08058），均有生產針對呼吸系統毛病的藥物。國藥（01099）是內地最大醫藥分銷商，基本上生意同全國醫療需求掛勾。世界好公平，有錢無錢人人都需要空氣存活，齊齊吸埋咁高濃度PM2.5，鳳凰醫療（01515）以IOT（投資、營運、移交）方式營運，是內地最大的私營醫療集團，要知有錢佬天性怕死，估值貴但都要加入考慮。