第二批白居二購買力將殺到，市場再傳有未攞到購買證嘅白居二「第二梯隊」買家偷步接貨。消息指，黃大仙公屋黃大仙下邨大單位，有「第二梯隊」透過口頭協議形式以近200萬元接貨，售價仲比年中高位平。樓市咁靜，多個公、居屋第二市場供應重點地區交投陷入停頓，馬鞍山同天水圍本月都未有白居二成交。

市傳有黃大仙公屋錄得白居二「第二梯隊」偷步接貨個案。（資料圖片）

部分地區公、居屋第二市場市況

劉Sir收到到風，房委會本月中、下旬會開始向第二批2,500個白居二中籤人士發「批准信」，「第二梯隊」就可以申請「購買資格證明書」，相信最快今個月底批出申請，隨即入市。

不過，市場啱啱有消息話，繼上個月旺角居屋富榮花園有偷步個案，相隔近一個月再傳出有同類情況。話黃大仙下邨有業主同「第二梯隊」口頭傾好沽出1伙大單位，建築/實用面積約700/544方呎，意向價近200萬元，相比較早前高位200幾萬元明顯低咗。

竹園北邨削28萬售

雖然第二批白居二未出現，但第一批仲有好多合資格人士，不過，市場缺乏承接力。黃大仙區今個月得1宗白居二成交。上星期竹園北邨11座高層10室，減價28萬以160萬元賣咗，建築/實用呎價約2,797/3,612元。

同區部分居屋業主見市況麻麻，業主都肯放盤求套現，如慈愛苑同鳳德邨，第二市場放盤增加達兩成。

事實上，第二市場屋苑雲集嘅馬鞍山同天水圍區，交投就陷入停頓。世紀21奇豐梁榮貴同劉Sir講，馬鞍山近呢兩個月未有白居二成交個案，部分更出現封盤。

祥益地產黃肇雯話，天水圍睇樓氣氛緩慢，十一月底先有首批白居二，以市價219.8萬購天頌苑單位。

富榮綠表320萬易手

家天下黎振傑又話，業主減價就有承接，富榮花園6座低層6室，減價6%以綠表價320萬元賣出。