近年唔少散戶搶受辣招影響較細嘅工商物業，好多商場「劏舖」熱賣。由尹柏權等舊年悉數拆賣嘅荃灣地皇廣場235個「劏舖」，面積由最細嘅50方呎，到最大嘅174方呎，入場費233萬元，佔約八成買家係同區街坊客。

荃灣地皇廣場舖位，面積由約五十方呎起，佔約八成買家是同區街坊。

改裝工程預期今年底可竣工。

地皇廣場成交個案

荃灣有個代理同劉Sir講，該區港鐵站附近地舖買賣放盤唔多，加上業主開價狠，成交呎價一般約6至7萬元，投資者尹柏權都睇通呢點，舊年九月斥逾4億元，向老友「舖王」鄧成波買咗荃灣大河道登發大廈地下部分舖位，以及樓上1至3樓全層，呎價只係1.65萬元。

「劏細」後223萬入場

之後，喺今年初將上址改名為地皇廣場，跟住「劏細」成200多個商場舖位，以摸貨形式拆售，設計上刻意以面積細、靈活為賣點，入場費約233萬元，整批舖位平均呎價去到約3.5萬元。

個代理帶劉Sir去地皇廣場參觀，項目「劏細」工程差唔多搞掂，1至3樓每層都有扶手電梯直達，每層舖位分三排組成，左右兩旁同中間，樓底均高達3米，共200多個舖位，佔九成面積50至80方呎迷你舖。

由於該商場舖位較迷你，故設計上都以玻璃同透明膠片嚟做間隔，以增加空間感，加埋透明摺閘，整個樓層睇起上嚟大好多。

呎價低街舖逾一成

其中1樓117號舖，建築面積約50方呎，實用面積約25呎，舖位長10餘呎，闊約2呎多，成交價約291萬元，呎價約5.8萬元，同區內街舖成交呎價比仍低逾一成，該舖單邊位以玻璃間隔，舖位感覺上大啲。

負責上述項目嘅美聯旺舖項目總監廖文傑話，地皇廣場舖位喺設計上以精細面積為主，業主提供首兩年每年租金回報約5厘的保證，加埋售價約233至450餘萬元為主，所以舊年十一月底預售，全數235個舖約一周火速售罄。近月只約10餘個舖位重售，亦已近全數售出。