前晚美國公布的多項經濟數據唔錯，十月新屋銷售按月勁升25.4%，創三十三年最大升幅；人力顧問公司ADP十一月私人企業職位調查，淨增21.5萬份，勝市場預期的17萬。華爾街觀望今晚官方十一月就業數據，以揣測聯儲局退市時間表，彭博綜合大行預測，估計非農職位增加18.5萬份（前月為20.4萬）。

太陽日誌 2013/12/6

美股高位抖氣，港股又回到前時的膠着狀態，連續第三日跌市，但跌幅唔大，恒指跌16點，報23,712點，同三中全會《決定》曝光翌日，大市急升超過600點的收市指數23,660點，只係相差幾十點，當日港股成交激增至1,120億，絕非一般散戶衝浪可以達致，信心大增的基金經理會唔會陰溝裏翻船，墮入走勢陷阱？作最壞打算，可能個市要悶到本月中，聯儲局議息至有答案。

久聞樓梯響的內地4G牌終於人人有份，永不落空，工信部向現有三個網絡經營商中移（00941）、中電信（00728）及聯通（00762）發出4G TD-LTE許可證，但三隻股票收市變動唔算大，只有聯通跌1.1%較為肉酸。大行預算領了4G牌之後，三大網絡商固定資本投入最快要去到一五年先見頂，估計推出服務的頭幾年，每戶攤分的折舊成本，同3G轉4G的月費收入提升，肯定不成正比。

最有可能受惠的設備供應商中興（00763）反高潮，股價高開低收，衰到倒跌散場，反而手機零件及OEM、ODM生產商炒到癲晒，比亞迪電子（00285）、富智康（02038）、中國無線（02369）、TCL通訊（02618）、瑞聲（02018）等統統搶高。

網股分享4G商機

查實推出4G，除對配備LTE傳輸速度的手機需求有正面幫助之外，網絡流量大幅提升，對多媒體內容供應商、手機遊戲及手機購物的長遠幫助同樣不容忽視，可惜本地選擇唔多，不過第一視頻（00082）、IGG（08002）、博雅（00434）及雲遊（00484）之中，段估至少有一兩隻有機會跑出，長遠投資價值應該比手機生產商高。

大落後股中，最睇唔透算係內地百貨零售股，大部分近期同店銷售未見起色，摩通早輪走訪百盛（03368）及銀泰（01833）分店，話年終促銷折扣分別高達50%及40%，牌面計，真係無乜理由支持放錢落去，亦難怪早輪出第三季業績，衰到貼地的百盛被一沉百踩。由彭博所見，28間有出報告大行中，24間嗌沽，4間建議持有，一面倒到極。

不過，金鷹（03308）大股東王恒日前向交易所披露，揸到5.01%百盛（買到踩過界的400萬股，成本價2.414元！），連行家都真金白銀入貨，照計點都貼市過收二手資訊的分析員。王恒響朵，始於去年國企王府井百貨收購春天百貨前，曾以私人名義買過春天，搭了一轉順風車賣畀王府井，但在股民眼中，已塑造無寶不落形象，加埋金鷹與百盛份屬對手，所謂知己知彼，買得多少有把握。

圍外人從第三季業績中搵唔到理由，但睇番春天收購作價大約1.6倍市帳率，2.414元買百盛不過0.98倍（尋日抽升後去到1.15倍），未計手上商場價值有重估可能，數埋街外平得過佢，仲有0.5倍的歲寶（00312）、京客隆（00814）同佳華（00602），問題係今次size太奀，筆者主觀認為，零售業短期淡風難改，這從近排銀泰、高鑫（06808）走勢可知一二。