近兩個月豪宅新盤排山倒海咁推出，加上唔少發展商以送稅務回贈作招徠，即時搶去市場唔少購買力。二手豪宅業主毫無還擊之力，只有零星減價盤先有買家承接。單以上個月計，35個指標二手豪宅計埋只得43宗成交，比十月嘅48宗，再減少逾10%，創○三年五月沙士以來嘅新低。

近期新盤主導市場，令二手物業買賣上月急降。（資料圖片）

近月指標豪宅交投量

部分指標豪宅二手成交量變化

利嘉閣董事張偉文同劉Sir講，一手新盤近月主導豪宅市場，二手物業難免受到冷落，搞到成交量持續尋底，上月數字更加係沙士以來最慘。

新界重災 勁跌一半

十一月35個指標豪宅只得43宗二手成交，3個主要大區交投各自發展，雖然當中只得新界區成交量報跌，但由於區內5個指標屋苑交投按月急挫50%至8宗，拖累整體成交量減少逾10%。

至於港島區走勢則持平；而九龍區由於有部分新盤向隅客回流二手市場，加上業主把握機會擴大議價幅度，增加成交機會，所以可獨善其身，報升20%。

16屋苑交投「捧蛋」

另外，「捧蛋」屋苑由十月嘅11個，增加到上個月嘅16個，十月時仲有三宗成交嘅尖沙咀港景峯、同兩宗成交嘅九龍塘畢架山一號，上個月都加入零成交行列。

張偉文又話，由於臨近聖誕，唔少業主同準買家都會外遊，睇嚟成交量將會進一步減少，十二月有機會再跌20%，有望跌穿40宗關口。

其實近期錄得嘅成交，唔少都係業主唔再堅持先可以成事，好似南區嘉麟閣2座中層B室，建築/實用面積約1,780/1,390方呎，原先叫價約4,000萬元，最終以約3,600萬元售出，建築/實用呎價約2.02萬元/2.59萬元。

另外，由一地產代理行高層持有嘅西半山雍景臺2座中層A室，近期以1,980萬元賣出，以建築/實用面積約1,390/1,151方呎計，建築/實用呎價約1.42萬元/1.72萬元，持貨三年帳面賺614萬元。

不過，亦有一啲罕有物業，承接力依然唔錯，好似西貢牛背窩一幢建築面積約2,100方呎的連花園物業，近期以3,800萬元賣咗，建築呎價約1.8萬元。

另註冊處資料，九肚山寶松苑雙號屋以5,500萬元沽出，買家為陳永善，原業主為CROWNING MOMENT LIMITED，該公司董事包括謝清海，該洋房三年升值1,315萬元。