日圓抖足半年後，近兩星期再次成為市場焦點，沽日圓仍是市場主流意見，上星期初其中一個藉口係伊朗同六國就削核達成協議，令風險胃納上升，同埋用日圓做融資貨幣套息交易！睇一眾交叉盤兌日圓都爆頂，不過澳元兌日圓呢隻海嘯前嘅套息交易寵兒就相當失色！

澳元兑美元走勢

雖然未來六個月仲未解禁伊朗石油出口，不過已經令油價繼續下跌。油價下跌可以令美國GDP稍為上升0.2至0.3%，而最開心嘅可能係法國，伊朗曾經係法國第四大出口國，而今次事件或可令法國汽車製造業受惠，解禁亦可吸引法國能源巨頭重新投資當地石油業，對幫助歐元區復甦亦有貢獻。

對日本嚟講，油價下跌，可令其毋須在日圓貶值令購買力大減的同時仲要捱貴油，對紓緩貿易赤字亦有幫助，令日本央行在繼續將日圓貶值上，可以擔心少一個因素。

總括而言，美元仍在整固階段，投資者仍可以揀基本因素弱嘅貨幣埋手，澳元一眾交叉盤，包括澳元兌紐元同英鎊兌澳元都明顯走弱，三種貨幣間邊個強邊個弱相當清楚。澳元兌美元阻力現處於0.9270同0.9350，相信升穿呢個水平機會唔大，而短期支持在0.9050。