Fundman睇市：中信泰富 勝在夠平

近期港匯強勢，反映資金持續流入港元區，遠的不提，自○九年至今，每次港匯貼住7.75強方兌換保證上限，港股都每每受惠，好似○九年第二至四季，恒指由13,576點升至最高23,099點，升幅70%，之後一○年第四季，港匯持續上升並短暫觸及7.75水平，恒指當時創出24,988點的海嘯後新高，第三次是去年第四季，當時美國推QE3加上人民幣強勢，金管局連番干預下，港匯仍維持在7.75水平徘徊接近一個季度，恒指當時由20,840點低位，升至翌年一月高位23,916點，累積亦有14.7%升幅。

二三線股禾雀亂飛

美國聯儲局主席伯南克及候任主席耶倫，先後預告美國並不急於退市，也間接令港匯近月轉強，十一月至今維持在7.7550水平樓上。然而，港股年初或十一月初至今累積6.1或3.4%升幅，表現是差強人意。或者，今年的確日股美股更具鑊氣，內地經濟復甦勢頭唔明顯，中資股被擺埋一邊。

兩年半以來，恒指終於首次企在兩萬四點樓上收市。雖然點數進帳唔多，但二三線股卻炒得相當誇張，66隻股票創五十二周新高，26隻股票升幅一成以上。CEC國際（00759）再下一城，升32%，收4.13元，一個月內升278%。鳳凰醫療（01515）創過11.96元上市新高後，收11.48元，仍升14.8%。剛介紹的Dynam（06889）升8.5%，但居然不及有份入股的澳門勵駿（01680），升17.6%見7.13元。

散戶同基金經理似乎深信賭場唔單止贏錢，直頭識印銀紙一樣。隨住港股鑊氣漸濃，人人變股神，史提芬反而唔敢亂作介紹，最怕愛你等於害你，揀着隻升得快跌得仲快嘅就弊。

大大落後股中信泰富（00267），西澳鐵礦石項目等了又等，未見貢獻，上星期被大摩出報告叫人避開，睇7.7元淡過水，但牛市就係咁，尋日趁個市禾雀亂飛，佢反而升穿十月初高位11.62元。計落中信泰富短期真係無乜故事，唯獨澳洲央行話要扶持出口，話晒佢仲係藍籌，更重要係市帳率得0.52倍，只及近十年歷史平均值一半，想執平貨嘅股民如果連航運、炭煤及電力設備都認為唔啱嘴型，或者可以諗吓佢，但先旨聲明，大升市買落後股，一旦唔跟升，可能仲慘過坐艇輸錢，唔係個個股民受得。