二手市靜到得人驚，業主唔出招，都幾難賣得出個單位，就連之前個價都「硬淨過」嘅銀主貨，都要低市價先賣到。好似鰂魚涌太古城放盤兩個月嘅銀主盤，最終肯減價，賣咗1,188萬元，比高位跌價3%，同區康怡花園之前無人要嘅銀主貨，低估價5%賣咗570萬元。另外，粉嶺牽晴間高層戶業主倣效新盤送釐印成功突圍，放盤一個禮拜即賣322萬元。

在靜市之下，二手樓業主紛出招自救。（資料圖片）

二手盤淡市突圍個案

有代理同劉Sir講，太古城呢個彩天閣高層銀主盤，建築/實用面積約902/792方呎，兩個月前叫1,200萬元，啱啱賣咗約1,188萬元，建築/實用呎價13,171/15,000元，個價比高位跌咗3%。

其實太古城今個月已連錄多宗成交，美聯吳肇基話，泰山閣高層E室，減價12萬元，即賣808萬元，實用呎價約1.17萬元。

另外，康怡花園N座中層銀主盤，係拍賣會賣過幾次無人吼，噚日忠誠拍賣會終於拍出，成交價570萬元，高開價40萬元，但比個別銀行估價低5%，建築/實用呎價約9,194/11,633元。

牽晴業主送釐印即沽

個二手市咁靜，業主出招自救。六福行吳家榮講，牽晴間4座高層D室，之前業主為出貨，又送釐印、又送佣金加埋成10幾萬元，放盤一個禮拜，再減多6萬即賣322萬元，建築/實用呎價約6,064/8,385元；但同區碧湖花園3座低層E室，之前賣262.8萬元，個業主見一手好賣，賠訂幾萬再賣274萬元，賣貴約11萬元。

消息稱，西南九龍帝峯．皇殿2座高層單位，賣2,450萬元，市傳呢個單位之前賣過約2,360萬元，但撻咗訂。

明園2期劈百萬甩手

其實有乜實際得過劈價。世紀21日昇話，北角明園2期高層30室，個業主減105萬元後，即賣到645萬元，實用呎價約1.08萬元，低市價10%。另外，中原又話，屯門大興花園2期6座高層E室，銀行估價330萬元，但最後只賣300萬元，低估價9%。

另一方面，睇番房委資料，十一月成個月只錄約83宗有關成交，比十月大跌約39%，亦係白居二開始入市以來最少成交月份，第一次跌破100宗成交。