今個星期五截標嘅屯門小欖冠峰街，以及同區青山公路─大欖段住宅地，都屬於「輕量級」地皮，規模係今季賣地計劃最細兩幅。有測量師老友覺得地皮投資額細，可吸引各路財團競逐。當中冠峰街地皮每方呎樓面地價最高估到8,532元，比月前批出嘅兩幅沙田九肚豪宅地仲要貴，而兩幅屯門地估值最高就合共約2.07億元。

青山公路─大欖段地皮發展密度高，將於本周五截標。（資料圖片）

屯門小欖冠峰街住宅地，市場估最高樓面呎價達8532元，或成為屯門最高呎價地皮。（資料圖片）

兩幅屯門住宅地皮資料

劉Sir知道，今次截標兩幅屯門住宅地規模係今季賣地計劃最細兩幅，當中冠峰街更加係「蚊型」級別，可建樓面只得約8,439方呎。老友韋堅信測量師行林晉超話，正正因為地皮規模細，所以買家種類相信較廣泛，中小型財團以至私人投資者都有機會入標，競投氣氛睇怕都唔差。

冠峰街每呎估8532元

由於投資額有限，有一定機會扯高地價，佢預期地皮估值約7,200萬元。屈指一算，折合樓面呎價高達約8,532元，係市場上限價，唔單止有力問鼎屯門最高呎價地皮，相比九月批出兩幅位於傳統豪宅區的沙田九肚地仲要高。

劉Sir話畀大家知，沙田市地段第578號及579號兩幅沙田九肚豪宅地皮，喺九月份以樓面呎價6,837元及8,382元批出，如果今次冠峰街住宅地真係以上述估值成交，樓面呎價將會比起兩幅沙田九肚地高出約24.9%及1.8%。

事實上，市區靚地供應買少見少，有發展潛力嘅新界地盤慢慢成為發展商新寵。最近政府批出嘅新界土地地價都幾好，好似十月份售出嘅屯門湖安街限量地，成交價5.51億元，市場當初都係估4億元唔夠；又好似啱啱上月批出嘅上水青山公路毗鄰香港高爾夫球會限量地，地價28.88億元亦高過估值上限多達三成。

大欖地皮料值1.35億

另一幅截標嘅屯門青山公路－大欖段地皮，發展密度就相對較高，總樓面約2.87萬方呎，市場估計呢幅地皮成交價介乎約0.918億至1.35億元不等。