或者係臨近年底的節日氣氛影響，又或者股市看穿了美歐日央行短期根本無停止印鈔的意圖，外圍股市牛氣沖天，隔晚美股三大指數全部向上，納指繼續挑戰十三年新高，投資者預咗安倍政府短期會擴大量寬好抵銷明年提高消費稅的衝擊，日經指數昨升277點，報15,727點，僅差1%就去到五十二周高位。

太陽日誌2013/11/29

大行預測翠華業績（港元）

昨日期指結算，大市一度升穿年初23,944點的高位，可惜再挾上動力唔夠，恒指見過24,014點兩年半新高後，在A股升幅收窄、及午後期指結算平均價取樣樣本足夠後，在最後一小時打回原形，恒指倒跌17點，報23,789點，主板成交633億元，上升及下半股份分別有618及667隻，升跌比例1：1.08。今日基金月結，相信粉飾活動將會見真章。

鄭煤機炒完要快閃

昨日提過煤股應該未炒完，秦皇島煤價向好，主要係年底往往係煤電談判訂立新一年合約價的大日子，煤商都會減少出貨量以提高講價籌碼，加埋市傳國務院提出扶持煤企的消息，兗煤（01171）昨跌0.4%，輪到神華（01088）及中煤能源（01898）發威，分別升1.5%。意想不到係，連鄭煤機（00564）都有啲鑊氣，超過九球成交，股價見5.61元，創下半年新高，但對比年初高位12.28元，仲係一半都無。

睇番鄭煤機首三季在訂單減少下，盈利大跌四成二至6.98億元人民幣，要知開採用煤機，一般要等煤炭市場火熱，供不應求礦主先會投資擴產，近期煤炭價格雖因為季節性及人為因素回升，但要旺到煤機生意反彈，似乎十畫未有兩撇，短線跟進無妨，但緊記快手炒完要識落車。

餐飲業奇葩翠華（01314）出成績表後股價散咗，昨插5.3%，落番去5.3元。公司半年業績賺8,549萬元，升32%，和營業額同期的42.7%升幅相比稍為遜色。睇期內毛利率升0.1個百分點去到69.8%，食物成本升42.8%，以上半年香港近4%通脹而言，其成本控制實在已經好到無話可說。

睇番有cover翠華的瑞信，績前預測上半年純利率12%，依家最終出來有12.3%，算超額完成，股價下挫，一句講晒係市場期望太高， 一三年市盈率38.6倍，同大快活（00052）及大家樂（00341）的13倍及24倍相比，高一大截，業績好都唔夠，要相當好至得。

筆者見佢餐包迷你咗、仿鮑片通粉突然變咗粟米通粉，多少feel到管理層想由食物成本方面打主意拉高毛利。但既然翠華走高級茶記路線，食物質素唔能夠太離譜趕客，最弊人仔短期睇升，食物成本在可見日子回落機會唔大，上市前透露翻枱率係極限級的一枱一日25張單，看來除咗多開分店谷業績之外都無乜計，個人認為，應可等股價返到4.5至5元水平至諗佢。