尋日期指結算，恒指一度高見24,014點，乃一一年四月以來新高，但三點過後開始掉頭向下，收報23,789點，跌17點，大市成交638億元。阿莊認為在確認突破大位前有反覆並不足奇，一切要睇A股去向。若A股動真格，港股無道理會背道而馳；相反，若A股拉牛上樹唔爭氣，咁港股可能會在假突破後再掉頭回試上落區底部支持。

受惠國家公布扶持政策，加上近周秦皇島煤價持續上升，利好煤炭板塊氣氛。（資料圖片）

一線股較波動，中移（00941）由全日高位84.25元回落至82.2元，收報82.6元，跌0.4%；和黃（00013）早段曾高見100元，惟尾段曾倒跌至98.5元，收報99.15元。反觀股仔仲好炒，嘉利國際（01050）急升74%、福記（01175）升36%、中裕燃氣（03633）升兩成。

異動股仔以小博大

事實上，呢期陸續有久違了的股仔交投或股價異動，如武夷藥業（01889），七星（00245）、威高（01173）、彩虹電子（00438）等。上周一提及具轉板概念的中國城軌（08240）宣布落實下月六日在主板掛牌，尋日升11.9%，總之隻隻都人氣十足！食住呢條水，阿莊專登在市值十億元以下的股份中搜索，發覺近期成交有異動或有條件燒冷灶的，有晶門科技（02878）、美麗中國（00706）、合豐集團（02320）、威發國際（00765）、晨訊科技（02000）、中國消防（00445）等，缸邊友經得起高風險好玩以小博大，不妨留意一下。

本月七日見報阿莊推介的台泥（01136），本周獲大股東提私有化，目標價話咁快就見。水泥股升得咁上下，博其他資源股接力，尋日煤炭股表現亦唔差，神華（01088）及中煤能源（01898）均升1.5%，兗煤（01171）曾升上8.71元，收報8.43元，跌0.4%。

上周，神華10日線升穿50日線，本周中煤及兗煤亦跟隨出現黃金交叉，技術上短線走勢利好。再睇消息面，前日中國煤炭工業協會網站公布國務院辦公廳《關於促煤炭行業平穩運行的意見》，幾大方向力挺煤炭業。此外，近周秦皇島煤價持續上升，主要係山西煤礦減產、北方暴雪天氣影響出貨、電力高峰期電廠需求增大，且一年一度的煤價談判前，煤企多利用各種手段推高煤價以盡量提升叫價。種種因素顯示，板塊氣氛可繼續回暖。

三者之中，阿莊屬意中煤能源，皆因價位相對細合短炒，二來走勢上亦正醞釀挑戰半年阻力5.5元水平，成功突破，可博叩6元關。