樓市由新盤主導，二手樓冇運行，部分將入伙新盤更首當其衝。好似馬鞍山嘅迎海，市傳有單位就算用「賣殼」形式，以約520萬元轉手，但連埋使費要蝕十幾萬元。二手業主心慌慌，就連荔枝角美孚新邨呢啲大藍籌，都重現400萬元唔使嘅放盤。

市傳馬鞍山迎海錄首宗蝕讓個案。（資料圖片）

近日二手業主慘況

劉Sir早前都聽過迎海已經有二手放盤，反應只係一般，不過尋日突然傳出，有個揸住兩件貨嘅業主，有意喺入伙前減磅。

其中一件2座中低層嘅兩房單位，建築/實用面積約663/512方呎，上年九月用咗約520.7萬元買入，已經用「賣殼」形式放盤一段時間，叫價唔貴只係540萬元，最終賣咗約520萬元，帳面蝕少少，不過連埋使費唔見十幾萬元。

北角炒家削200萬散貨

有代理就話，其實迎海依家買賣放盤有限，加埋都唔夠5個，全部都只係叫高20至30萬元，但新例所限，所有都要「賣殼」。反而租盤就有幾廿個，但未入伙難租出。

其實批炒家近排出貨都幾勇，世紀21北山彭志偉話，由炒家揸住嘅北角南方大廈低層A室，五月叫成600萬元，近期劈200萬元後，以400萬元易手，實用呎價7,273元，兩、三年間單位個價升成57%。

就連藍籌屋苑業主都「心慌」。香港置業余柏話，美孚新邨近呢半年，都無見過平過400萬元嘅盤，依家就有一個4期百老滙街111號頂層單位，建築/實用面積約588/442方呎，上個星期都叫緊410萬元，一減就減到390萬元，400萬元「有找」。

代理仲話，沙田第一城最好賣嘅建築面積約395方呎單位，市場至少有兩個叫價唔使300萬元。

映灣園業主封盤唔肯賣

其實一手樓當道，二手靜到無晒方向，有東涌代理喊住話，東涌月初到依家合共只有17宗成交，比上個月已經大跌50%。不過，同區映灣園16座有個中層放盤，原本都因為新盤開賣，減咗20萬到450萬元放盤，減減下業主見新盤勢旺，直頭封埋盤唔肯賣。