感恩節前夕，前晚華爾街股市交投淡靜，道指及標普五百指數變動唔大，反而Black Friday零售及網上零售旺季前，一眾預料受惠的電子消費品及互聯網股做好，Amazon、蘋果公司、Google及Facebook統統受捧，帶動納指十三年來首次重上4,000點樓上，升23點，報4,017點。

太陽日誌2013/11/28

綜合大行預測中建材業績（人民幣）

滬綜指重上2,200點樓上，港匯維持強勢，昨高見7.7518，加埋港版恐慌指數VHSI回落至15.83，看來港股要突破24,000點阻力，僅是時間問題。尋日恒指升125點，報23,806點，今日期指結算日，尋日十二月期指日市收23,865點，高水59點，可見期指大戶蝕住四、五十點轉倉都在所不計。踏入十二月，儘管乃傳統老外芬佬埋數放假的好日子，但睇大環境，下月初炒多浸派埋聖誕禮物至食火雞都唔出奇。

煤炭股繼續追落後

資金繼續由三中全會受惠股流向其他落後股，秦皇島動力煤價連漲五星期，去到每噸554元人民幣的一年高位，截至本月廿五日，秦島島煤炭庫存降至475萬噸，一星期減少70萬噸，亦係兩年來最低水平，消息刺激兗煤（01171）、中煤能源（01898）分別升1.3及1.7%，至8.47及5.11元，大落後的煤炭股在外部消息配合下，睇嚟未炒完。

中燃（00384）公布半年業績，營業額及純利大升46.4%及58.7%，至104.6億及12.83億元，每股盈利27.41仙，中期成績已經達到街外平均預測全年賺21億元的61%。尋日股價炒高7%，去到9.94元，相當於一四年三月年度19.4倍市盈率，以明年17%增長，燃氣股中唔算貴，但升到上10元，似乎將短期利好因素反映得七七八八，睇嚟可以等吓。

台泥國際（01136）被母公司台泥（TCC）以每股3.9元私有化，早兩個月史提芬已講過，華南一帶水泥價拾級向好，加上海螺（00914）及中建材（03323）等龍頭的策略聯盟協議，無割喉減價競爭，水泥股價值有被低估之嫌。今次TCC以一三年10倍市盈率出價將台泥收歸己用，相對TCC本身一三年預期市盈率近17倍，難怪消息在台灣方面相當受落，尋日TCC股價仲創埋一年新高。

本來筆者對中短線水泥價格睇好，不過今次交易立竿見影，可見台泥管理層有幾睇好後市。展望華南更多大型基建啟動，廣東一帶新增產能又相對少，趁目前估值仲唔高（起碼台泥國際畀咗10倍PE的標準你睇），其實仲有好多行家可以揀，好似龍頭股之一的中建材，大行預算今年底明年初，資本需求會度過高峰期，水泥價睇升加上現金流改善，業績唔難有持續改善，現價8.74元，計落一三年PE唔夠7倍，尋日升得3.2%真係算少，照睇去番年初股價11.34元，都仲有近三成升幅，博得過也。