尋日港股早段仲係呆呆滯滯，點知到上晝十一點左右，祖國魚缸突現「暴力哥」，滬綜指抽上2,207點，港股乘勢打破悶局，恒指收報23,806點，升125點，大市成交690億元。

比亞迪電子近年致力開發高端移動智能設備部件業務，策略獲得市場認同。(資料圖片)

呢頭話創維（00751）上方阻力在4.5元，目標即日實現，成交像樣，別太早估頂。乳品股升勢隨原生態（01431）上市潛水而暫告段落，合生元（01112）逆市跌5%。鳳凰醫療（01515）明日掛牌，醫藥股會唔會步乳品股後塵，不妨等睇戲！

光國宜逢高減持

光銀趕搭IPO尾班車，尋日同系的光大控股（00165）及光大國際（00257）分別升2.7%及5.7%，其中光國買盤積極，事緣大行瑞信將其目標價定在10.4元。阿莊就認為，光國上到9元樓上估值已偏高，屆時持貨者可逢高減持，候調整出現再作考慮。

尋日市場盛傳，今日內地將發放4G牌照。也許呢半年聽過唔少呢類傳聞，且距離年底的發牌限期尚餘日子亦不多，日日傳發牌，最終有一日成事實！講開電訊呢瓣，尋日專門做手機部件及相關組裝服務的比亞迪電子（00285）股價有睇頭，升6.7%，收報3.78元，成交6,149萬元。

近年，比電重獲基金關注，主要係認同公司因應智能手機及平板電腦等移動智能終端的興起，致力開發高端移動智能終端部件及模塊業務，以及ODM業務的策略。有指唔少由富智康（02038）流失的客戶，轉移幫襯比電，其致勝之處，在於成功開發塑料與金屬的混融技術，大大提升了金屬外殼的機械性能。隨着金屬外殼款式的智能手機需求持續增加，將為比電廣開財路！

阿莊睇好比亞迪股份（01211）及比電一門二傑的業務前景，上月下旬已推介過比亞迪。至於比電，今年上半年賺3.17億人仔，同比增21%，料全年純利可重回甚至超越一一年水平，若明年首季成功取得三星新單，估值尚有上調空間。以現價計，一三及一四年度預測市盈率分別為12倍及7倍，未來內地推動三網融合、3G滲透率上升，以及發展4G網絡，將為比電業務帶來可觀商機，上車有心唔怕遲。走勢上，年中以來股價調整守穩3.5元水平支持，尋日成交增加，若能突破上月高位4.04元，下站阻力睇4.5元。