外圍經濟風高浪急，寫字樓買家自然要睇定啲先入市，加埋政府二月推出雙倍印花稅（DSD）辣招，就更加無運行。睇番代理嘅資料，去到呢個星期初為止，今年頭十一個月港島12幢甲級寫字樓買賣宗數約50宗，同舊年同期比少約38%，比○三年「沙士」同期更加少約一半，係自該年以來最慘淡嘅首十一個月。

今年首十一個月，港島甲級寫字樓買賣急降。(資料圖片)

今年首十一個月港島甲級寫字樓矚目成交

劉Sir將美聯商業同幾個代理行嘅資料整合，發現截至今個月二十五號，今年頭十一個月，上環信德中心及金鐘力寶中心等12幢港島甲級寫字樓，加埋得嗰50宗買賣，比起舊年同期約80宗，少咗約30宗，仲「慘過」○三年沙士時期。

招後冷清 兩幢未開單

比起○四年寫字樓買賣最旺嗰陣有約300宗，更加少約250宗，差幅達約83%。

DSD措施後，寫字樓買賣「謝晒」，今年一月及二月港島甲級寫字樓買賣超過30宗，高佔今年頭十一個月成交量逾83%，即係招後成交宗數20宗都無。

若以大廈劃分，信德中心、中環皇后大道中九號，同埋金鐘美國銀行中心等共10幢大廈，期內每幢買賣成交量由1至6宗不等。另外有兩幢大廈到今年為止仲係「食蛋」。

向來係炒家樂園嘅力寶中心逆市買賣佔最多，加埋約30宗，佔期內整體約60%，但大部分係出招前錄得。

交易成本增 棄購頻現

代理話，主因係招後有投資老手撻訂離場，減低市場入市意欲，撻訂單位係力寶中心2座5樓11至12室。

投資者黎汝遠今年一月以3,903.9萬元買入之後，同月以確認人身份賣畀投資者黃海明，涉資約4,330萬元，呎價約兩周升至約19,691元，但係今年四月成交期之前，兩人都決定撻訂棄購。

美聯商業營業董事羅仲英話，辣招加重物業交易成本，再加埋市場陸續有資深投資者撻訂個案，因而大大打擊準買家入市嘅信心。