匯市仲係死氣沉沉，美匯指數喺80.38至80.58間已經有支持。月初歐洲央行意外減息，其中一個原因係要防止歐元過強帶嚟嘅通縮風險。如果依家歐元重返1.38，咁減息嘅效果就前功盡廢。

歐元兌美元走勢

如果我係歐洲央行官員，眼見早前歐洲經濟最壞時機過去，策略上自然係唔好畀佢停，繼續出口術明示暗示實施負利率或LTRO等進一步放水嘅措施，以令歐元匯價回落，並刺激出口。如果呢個思維無錯，歐元自然難以進一步走強，本周趁美元有少少調整，最理想係見到1.3620水平開歐元淡倉，止蝕1.3720，目標先睇1.34水平，最終目標睇番前低位1.3290。

「退市」兩個字由五月玩到依家真係玩得太耐，如果係今年十二月可以退，會令市場意外，美元自然爆升。但就算係明年三月，聯儲局只要唔係出其不意進一步放水，同歐洲、日本仲繼續放水都仍然有個明顯分野，美元相信不會急跌。當然要美元爆升嘅催化劑，就要有一系列數據、消息令市場相信「十二月退市不是夢」。

市場預期可以由零售銷售到本周嘅感恩節銷情等慢慢營造，不過還原基本步，一眾央行對退市、加息及進一步放水的取向，仍清楚地為一眾外幣之方向引路。

GMO CLICK環球通副總裁 陳健豪