藉美股上周五慣性再創新高之助，港股昨日以接近全日高位開出，可惜A股唔就，拖累恒指開高走低，倒跌收場，但點數損失唔多，僅跌11點，報23,684點，睇嚟個市高位整固多幾日，有機會在周四期指結算前後，發力突圍。

太陽日誌

今日掛牌的原生態牧業（01431），業務同現代牧業（01117）好接近，奇怪近期乳業股因為一孩政策放寬及中央重點扶持而炒到出煙，但原生態僅保守地以非上限的2.7元定價，按此計一四年市盈率17倍左右，平過現牧近三成，加埋淡馬錫及蒙牛（02319）等大孖沙入股撐場，但尋日傍晚見到，暗盤價居然只係在招股價水平浮沉，係咪咁大隻蛤蜊隨街跳，今日會有答案，如果手上有現牧的，或者可以考慮沽些少換吓貨。

資金跟隨MSCI執位

今日收市，大摩MSCI亞洲指數成分股權重變動，大行計過數，預計較明顯有資金流入（超過一日平均成交）的包括（按多寡次序）新世界中國（00917）、海天國際（01882）、合生元（01112）、北控水務（00371）、漢能（00566）及中石化煉化（02386）；流出的股份包括東方海外（00316）、大昌行（01828）、百盛（03368）、山水水泥（00691）、達芙妮（00210）、波司登（03998）、招金礦業（01818）、南航（01055）、瑞聲（02018）及中燃（00384），看官們自己執生。

九九年配合內地銀行改革成立，專幫內地金融機構收購不良資產的「收買佬」信達資產管理（01359），上市前路演進行得如火如荼，據知至少有八個基礎投資者入局，好不熱鬧。

信達國際子憑母貴

可能子憑母貴關係，尋日香港子公司信達國際（00111）早市狂炒，股價見1.65元的近兩年半新高，之後在下午兩點拉閘，股價報1.42元，升37%。口痕友話，一定係基金為免向隅，於是掃埋阿囝。照計阿媽自己上市，已無咗借殼的可能，到底有乜搞作？惟有等公司通告。

講番信達資產，消息指招股價介乎3至3.58元，相當於今年預測市帳率1.13倍至1.31倍，同四大國有銀行中（03988）、建（00939）、工（01398）、農（01288）的一三年預期市帳率0.88、1.13、1.18及1.16倍比較，承銷商絕對唔算賣大包，不過，大孖沙依然趨之若鶩。

一句講晒，刻下買信達同買內銀最大唔同，在於享受到內地不良資產質素改善之餘，又唔使怕內地銀行業改革、未來息口進一步市場化的風險。如果基金經理要在內地金融資產上加注，信達是必然選擇。史提芬估計，信達掛牌之初賺面頗大，但基於業務屬性唔同，大家千祈唔好期望會好似有雲遊（00484）、博雅（00434）或者鳳凰醫療（01515）一類新股開波的癲法。

執屋搵到張○九年證券行月結單，原來當時3元買過聯想（00992），計落揸到依家9.18元，等於平均每年28%回報，換轉普羅股民或者已經諗如果時光倒流，應該瞓身唔使日日對住魚缸上上落落，可惜礙於工作，在下無乜可能咁長情。

講開又講，早排大行話智能手機商小米估值100億美元，筆者就指出聯想智能手機出貨多過小米近倍，有乜理由連100億美元市值都未有。結果，下半年聯想股價升三成，市值122億美元，一四年市盈率16倍左右，依家內地TMT股炒風咁勁，感覺仲未算好貴，睇嚟今年底明年初，有機會挑戰10元樓上。