尋日恒指開市已見全日最高位，之後窄幅上落，全日波幅僅156點，收市微跌11點，成交僅575億元。其實外圍歐、美魚缸氣氛唔差，最大問題係A股升到咁上下又冇咩力水，三中全會公布詳解的刺激已暫告一段落，若然A股繼續呆呆滯滯，港股高位回吐壓力漸增，較穩陣的做法係少沾手重磅或指數相關衍生工具，專攻二、三線股，咁萬一指數真係向下走，都可避免首當其衝。

綜合券商預期，今年度李寧業績虧損可望大幅收窄，明年更有機會扭虧為盈。（資料圖片）

想翻兜的中興通訊（00763）唔係點肯回，晨早17元邊排入唔成功，惟有繼續等。若然嚟緊大市走低，阿莊會選擇先沽出弱勢的粵海置地（00124）。

銷售策略有所提升

每年年尾，阿莊例牌會去粵北走一轉，今年亦唔例外。早兩年阿莊都提過，見住同一條步行街，由一家本地體育用品品牌閒閒地有成四、五家分店，成街都賣運動用品，但客人唔多，到咗之後各品牌分店數目收縮至僅一家。

過去一個周末，阿莊所見，部分品牌分店數目又回升至兩家，但整體感覺良好，一線品牌唔會再好似兩年前咁以維持形象為由唔肯減價，依家見到普遍做緊五至八折，人流都幾唔錯。可見，過去兩年業界經歷逆境後，都明白到控制存貨的重要，銷售策略確有所提升。今次另外一個發現，就係見到步行街內的金飾店愈開愈多，單係本港某上市知名品牌分店已有三家。

講開體育用品股，李寧（02331）尋日股價異動，高位見7.16元，收報7.1元，升6%，成交增至1.19億元。上月，李寧股價高見7.76元後反覆回落，惟本月基本上都守在50日線（現處6.55元）樓上，昨日升勢有成交配合，不妨留意是否醞釀新消息。

去年李寧蝕19億元（人民幣．下同），今年上半年虧損收窄至1.84億元，綜合券商預測，今年全年虧損會大幅收窄至約3.1億元，明年復甦勢頭將趨明顯，並帶動業績轉盈。走勢上，過去兩年，李寧股價已成功營造大圓底，末季升浪確認突破今年年初高位，未來一年在復甦主題帶領下，股價料可持續升勢，六個月目標挑戰8元（港元．下同）大關，可候回吐在6.8元水平才分注作中線部署，主要支持在6.5元水平。