內地旅客嚟香港「血拼」足迹愈嚟愈廣，就連尖沙咀重慶大廈都攻陷埋。內地人掃貨主要目標嘅藥房，就以每月超過70萬元，租咗大廈地下一個向正彌敦道嘅地舖，呎租超過700元，比起之前影音店租戶嘅租金，高出75%，同時今次亦係幢大廈首次有藥房租客進駐。

剛獲藥房承租的重慶大廈地下1號舖，面積約1000方呎。

近期內地人掃貨目標商戶進駐情況

提起重慶大廈，劉Sir就諗起影帝梁朝偉早年擔演嘅重慶森林，都係喺度取景。

依幢大廈樓高約17層，樓上住客唔少係亞洲少數族裔同埋非洲等唔同國家人士，近年就多咗啲內地年輕人同大學生喺度住，所以地舖租戶都出現變化。除咗咖哩餐館同售賣小型家電用品外，近年多咗找換店，同埋上述內地旅客至愛嘅藥房。

面積千呎 月租逾70萬

喜來登旺鋪陳志業話，啱啱進駐嘅藥房租咗重慶大廈地下1號舖，面積大約1,000方呎，之前租客係影音店，原本月租約40幾萬元，約三個月前租期屆滿就無續租。

上述舖位嘅業主，本來叫租每月約110萬元，目標租畀大品牌零售商，等咗一段時間，覺得藥房近年人氣急升，都算係鐵約租客，所以決定平少少，減約36%以每月逾70萬元租出個舖。

名錶貴兩倍租龍頭舖

其實，近年唔少同內地客有關嘅商戶都大肆擴充，今年中，有個歐洲名錶品牌以約90萬元，租用同區海防道53至55號及樂道交界嘅單邊龍頭舖，呎租約2,000元，比起前小食租客租金高約兩倍。

另外，有代理話，近排多咗用家入市港島甲級商廈，所以交吉盤特別搶手，做價都好高。

代理話，由於皇后大道中九號放賣盤得十幾個，而交吉單位更只有幾個，所以買家只有出高價，先至可以打動業主割愛。

皇九呎價2.9萬創新高

聽講中環皇后大道中九號有個中層交吉戶，由於單位對正升降機，有個買家以約9,540多萬元購入，呎價去到約2.9萬元，創該廈呎價新高，仲係全港商廈呎價第三高；同首位嘅金鐘美國銀行中心，以及次位嘅灣仔會展廣場辦公大樓呎價，分別只低約一千元及五百元。