為樓市降溫而推出嘅額外印花稅（SSD）措施，唔經唔覺已推出咗三年，依家樓價對比三年前依然升咗好多，但住宅炒風確係大幅減少。劉Sir喺地產代理嘅數據睇到，過去三年住宅摸售成交只得768宗，比措施推出前三年大減89%。

為樓市降溫而推出的額外印花稅（SSD）措施，面世已經三年，交投大減惟樓價仍然高企。（資料圖片）

住宅模貨註冊量走勢

住宅摸售3年768宗

美聯首席分析師劉嘉輝話，由一○年十二月至今年十一月十八日嘅三年間，住宅摸售登記只得768宗，即係平均每月得21宗，相比措施推出前三年，有多達6,746宗登記，平均每月187宗，措施威力果然強勁，令摸售數字足足減少89%。而今年情況更為顯著，至今計落只得20宗同類個案，可以話摸售短炒已近乎絕迹市場。

若將近一年只得20宗摸售登記，相比期內整體二手住宅註冊量40,989宗，摸售比率只有約0.05%，意味着每1萬宗二手住宅買賣個案中，只有約5宗係摸貨。

投資者短炒變長揸，引發市場流通嘅盤源減少，同時近一年多政府再推出買家印花稅（BSD）同雙倍印花稅（DSD），喺「3D齊出」嘅影響下，過去三年間，二手住宅註冊宗數累錄192,334宗，比起之前三年嘅318,113宗，大跌約四成。

嘉湖扣除SSD仍賺

SSD措施是希望透過徵收稅款，以增加短炒成本，不過近呢幾年樓價依然升唔停，即使近排樓市出現調整，但樓價只係回落番少少，所以唔少業主就算扣埋稅，賣樓都有不俗嘅利潤。

祥益地產謝利官話，天水圍嘉湖山莊樂湖居11座低層E室，建築/實用面積586/448方呎，最近以260萬元賣出，建築/實用呎價約4,437/5,804元，原業主揸咗個單位唔夠兩年，扣埋約13萬元SSD，帳面都賺約36萬元。

另一方面，屯門大興花園啱啱都有一宗辣招盤成交，利嘉閣葉瑋珩話，屋苑2期2座高層H室，單位建築/實用面積約535/418方呎，賣咗約278萬元，原業主去年三月以約209萬元買入收租，依家扣除SSD，上述單位業主持貨約一年半帳面賺約55萬元。