上周五頁岩氣概念板塊吐氣揚眉，華油能源（01251）急升7.5%，成功企上5蚊關收市，就快見番五十二周高位5.2元，今年以來首次大幅拋離保力加通道頂，配合10日線升穿多條平均線，加上佢獲納入大摩MSCI小型股香港指數，升勢點會得咁短癮！

華油中期收入及純利一樣增長近五成，分別至8.7億元及9,757萬元人仔。雖然外界早前質疑內地頁岩氣的勘探開發仲處於早期階段，但公司股價喺九月見底後已反覆回升，近日有傳內地快將進行第三輪頁岩氣探礦權招標，產業樽頸正在突破，估計好快交到產量，加上國家能源局發布「頁岩氣產業政策」，提出將佢列入國家戰略性新興產業，按開發利用量撥出補貼，始終係新能源發展大方向。另外，大摩亦話公司可以進一步取得及轉型至更高端的整合服務上，畀佢目標價5.6元，可以增持。

華油能源（01251）

阻力位：5.5元

支持位：4.5元