銅鑼灣貴為全球呎租金最高地方，一線街舖幾乎全部被連鎖珠寶店同時裝店霸佔，大部分特色食肆或本地茶餐廳惟有退守謝斐道。不過，早排日本知名食府喺度開設香港首間分店，帶旺成條街人流，業主自然就心郁郁要加租。劉Sir聽聞，時裝店同埋甜品店呢類商戶，好快無定企，因為業主話會加租，租金加幅由超過五成半到近1.2倍，有啲新呎租仲逼近400元，貼近同區一線位波斯富街地舖入門呎租。

銅鑼灣謝斐道有知名日本食府首度進駐，預料會帶動舖租上升。

食客心聲
常到謝斐道食店的蕭小姐指，食肆搶租謝斐道，租戶執位是大勢所趨。

商戶心聲
謝斐道麵店負責人黎先生表示，有更多食店進駐，可帶旺該街道人流。

銅鑼灣謝斐道最新地舖租賃及放租個案

橫街地舖半數食肆

雖然銅鑼灣啲舖租咁貴，不過仍然有唔少橫街租金仲可以接受，吸引唔少食肆進駐，其中謝斐道商戶就以餐廳等食店為主。有代理計過，條街約有30個地舖租戶，同食有關嘅就高佔一半，包括咗今年落戶嘅日本著名食府一蘭拉麵，佢哋就租咗440號地下H及I舖，月租約23萬元，呎租約66元，係佢哋喺香港第一間店舖。

就因為有知名食肆進駐，唔少靠近大商場嘅街舖，因為地理上佔優，業主都準備大幅加租。劉Sir收到風，甜品店租用幾年嘅謝斐道雙號地舖，依家月租超過30萬元，業主意向新租近50萬元，新租金升幅逾五成半，呎租約385元，拍得住同區波斯富街地舖入門呎租。

依家時裝同飾物店喺謝斐道嘅數目，同一年前比已經少咗好多，目前只有約5間。目前該街道雙號一個地舖，時裝店幾年前租用，租約就快到期，業主加租至逾30萬元放租，呎租約250元，加幅近八成。

兩項目落成勢更旺

喺謝斐道經營麵食十幾年嘅黎先生話，近月條街「食客」多咗，相信唔少食肆都心郁郁進駐，如果現址唔係老友以「友情價」租畀佢，早已捱唔到今日。

唔少食肆都吼實條街，原因之一係有兩個大型商業重建項目，相信會吸引更多人流。其中，豐泰地產嘅531號中央樓重建項目，正重建做銀座式商廈，料二○一五年落成。另投資者黎永滔嘅謝斐道同景隆街交界嘅顯輝中心商廈及隔籬舊樓，亦會重建做一幢4層高巨舖。