澳洲央行上周議息後維持現有利率2.5厘不變，絕對唔令市場意外，因九月零售銷售繼八月上升0.5%後再升0.8%，而當地第三季房地產價格按年升7.6%，樓市升溫即係話澳洲減息周期已經結束，因為再減息就會進一步推高樓市。

澳元兌美元走勢

既然澳洲樓市、消費市道好番，咁唔減息都好合理，亦都可以短線令澳元喘定。不過，澳洲央行就唔係咁睇，覺得依家嘅匯率仲係太高，非礦業嘅經濟部門仲係充滿變數，失業率有機會繼續上升。仲記得前星期央行行長先話澳元可能有明顯嘅貶值空間，就算減息空間唔大，未來央行繼續傾向弱澳元政策去刺激經濟。

如果咁睇，中線澳元都係繼續跌嘅機會較高，不過如果減息周期完咗，年內澳元應該會比年中急跌時候會出現喘定情況，預期年底前澳元波動空間介乎0.93至0.98。如果有機會跌至0.9250至0.9300，將屬一個低吸的機會。

不過，一日澳洲唔加息，澳元都難有大升條件，如果用年內高位1.0580跌至0.8850計，反彈50%剛好是0.97、61.8%則可達0.99，今次反彈由0.88起步，至0.9750或已完成反彈，欲重上一算仍然係「不可能任務」，而澳弱紐強嘅趨勢仍舊唔變，想收息嘅話，仍然係揀紐元好過。