眼見上星期五美國就業數據遠勝預期，掀動美債息抽升，預示市場對聯儲局退市的睇法有轉向迹象，唔少分析，包括筆者都擔心緊22,500至22,600點有大堆牛仔等待屠宰的港股，兇多吉少，點不知畀大戶捉到羊群心態，逆向操作，殺淡友一個片甲不留。昨恒指終止五連跌，午後見A股回穩仲愈升愈有，最終升325點，收23,069點，主板成交527億元，比上星期五多22億元，未算配合升市。

太陽日誌

姑勿論點，技術上尋日恒指一口氣收復10及50日線23,056及22,968點，即市更曾經突破埋20日線23,083點。儘管唔少看官同筆者一樣，預期經歷兩個月橫行市，港股第四季有機會「向上走，向下走」，大戶揀一邊破位後進入單邊浪。

可是，實際上睇番恒指波幅指數，六月底見30.18一年高位後，七月下旬經已重返15至20的低位徘徊（昨日收15.77），至少短期內，見唔到衍生工具莊家同公眾睇法相同。經過昨日一升，港股後市由搖搖欲墜返回原點，繼續上落市格局。

雅士利反彈未夠喉

蒙牛（02319）八月收購雅士利（01230），因持股量去到89.82%，令後者公眾持股量唔夠而被勒令停牌。日前蒙牛終割愛以每股3.5元沽4.71%畀厚樸同淡馬錫，持量落番去76.58%，停牌近三個月的雅士利也得以復牌。老實講，尋日雅士利升17.1%，收4.24元，升幅係意想不到咁「少」。

睇番拉閘以來，國家表示以百億銀彈支持內地乳業，乳業股炒到出煙，期間合生元（01112）升咗47.2%、現代牧業（01117）亦升43%，昨日雅士利的補漲幅度，其實好溫和。更重要係厚樸、淡馬錫都唔係短癮炒家，意味雅士利得返一成街貨左右，以市值150億元計，即係得15億元，尋日扣除上板16.49億元，大約仲有2.5億元易手，即係街貨的16.6%，可以估計呢隻股票已乾無可乾。

雅士利往績PE去到21.6倍，同合生元、現牧比仲低一截，依家個市只係得貴一貴都有基金捧場的增長股，或平到暈的發霉股，照睇尋日在4.1元停咗好耐，可作為短線入市參考。

博雅保薦行留一手

網股靜咗幾日，尋日終於有番些少反彈，騰訊（00700）及雲遊（00484）升2.4及2%，網龍（00777）一彈就9.9%，估計同今年凍資王、超額831倍的博雅（00434）今日掛牌有關。睇暗盤成交唔少，升32.5%收7.09元，同日掛牌的徽商（03698）升1.1%收3.57元，至於上星期上市嘅重慶銀行（01963），依家仲差一格至番到去6元上市價，唔使講今日焦點都集中在博雅身上。

近兩星期上市的新股，撇除「全配售」私人派對的新銳（08180），九隻之中得兩隻有錢贏，分別係普華和順（01358）同中國賽特（00153），升10.3%及7.7%，毅德（01396）無升跌，重慶行、Mega Expo（01360）、先鋒醫藥（01345）、景瑞（01862）卡賓（02030）及中國匯融（01290）潛水幅度介乎0.1至11%，顯見買嚟賣正是主流。

博雅IPO要入飛三十手先穩獲一手，散戶攞唔到就梗，據知基金就算碌晒人情卡，都先至分得三幾萬股，估計貨源會分得好散，尚幸學雲遊一樣，保薦行留一手，招股價5.35元，並未以上限5.6元定價，可能會吸引到有些少貨底的基金，在二手市場再買多少，令首日走勢不至於太肉酸。

講開又講，就算今日博雅開7.09元，計落市值亦不過得52.2億元，秤埋都唔及騰訊嘅1%，亦未到部分基金10億美元市值以上的投資門檻要求，就算基金真係要押注內地網股，本地其實仲係無乜選擇。